ប្រធានាធិបតីអេហ្ស៊ីប លោក Abdel Fattah El-Sisi កាលពីថ្ងៃពុធ បានបញ្ជាក់ជាថ្មីថា បុព្វហេតុប៉ាឡេស្ទីននៅតែជា «អាទិភាពចម្បង» នៅមជ្ឈិមបូព៌ា ដោយសង្កត់ធ្ងន់ថា សន្តិភាព និងស្ថិរភាពមិនអាចសម្រេចបាននៅក្នុងតំបន់នេះទេ ប្រសិនបើគ្មានដំណោះស្រាយដ៏ត្រឹមត្រូវចំពោះបញ្ហានេះទេ។

ក្នុងអំឡុងពេលថ្លែងសុន្ទរកថារបស់លោក នៅក្នុងកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោក (WEF) នៅទីក្រុងដាវ៉ូស (Davos)ប្រទេសស្វ៊ីស លោក El-Sisi បាននិយាយថា ការដោះស្រាយបុព្វហេតុប៉ាឡេស្ទីន «បង្កើតបានជាខ្លឹមសារនៃស្ថិរភាពក្នុងតំបន់ និងជាមូលដ្ឋានគ្រឹះ ដើម្បីសម្រេចបាននូវសន្តិភាពដ៏យុត្តិធម៌ និងទូលំទូលាយ»។

លោកប្រធានាធិបតីអេហ្ស៊ីប បានស្វាគមន៍ចំពោះការចាប់ផ្តើមដំណាក់កាលទី២ នៃបទឈប់បាញ់នៅហ្កា ហ្សា ដោយសង្កត់ធ្ងន់លើតម្រូវការក្នុងការប្រើប្រាស់លទ្ធផលនៃកិច្ចប្រជុំកំពូលសន្តិភាព Sharm El-Sheikh នៅថ្ងៃទី ១៣ ខែតុលា ឆ្នាំ ២០២៥។ កិច្ចប្រជុំកំពូលនេះ បានបង្កើតកិច្ចព្រមព្រៀងឈប់បាញ់នៅហ្កាហ្សា ដែលបានបញ្ឈប់ការប្រយុទ្ធគ្នារយៈពេលពីរឆ្នាំ រវាងអ៊ីស្រាអែល និងក្រុមហាម៉ាស។

ភ្លាមៗបន្ទាប់ពីសុន្ទរកថារបស់លោកទៅកាន់វេទិកាសេដ្ឋកិច្ចពិភពលោក ក្រសួងការបរទេសអេហ្ស៊ីប បាននិយាយថា លោក El-Sisi បានទទួលយកការអញ្ជើញពីប្រធានាធិបតីអាមេរិក លោក ដូណាល់ ត្រាំ (Donald Trump) ឲ្យចូលរួម «ក្រុមប្រឹក្សាសន្តិភាព» របស់លោក។

សេចក្តីថ្លែងការណ៍នេះបានឲ្យដឹងថា ប្រទេសអេហ្ស៊ីប «ប្រកាសពីការទទួលយកការអញ្ជើញ និងការប្តេជ្ញាចិត្តរបស់ខ្លួន ក្នុងការបំពេញនីតិវិធីច្បាប់ និងរដ្ឋធម្មនុញ្ញពាក់ព័ន្ធ» ដោយសរសើរលោក ត្រាំ ចំពោះគោលនយោបាយមជ្ឈិមបូព៌ារបស់លោក៕