កាលពីថ្ងៃពុធ (២១ មករា) សហរដ្ឋអាមេរិក បានព្រមានក្រុមប្រឹក្សាអន្តរកាល ដែលទទួលបន្ទុកលើប្រទេសហៃទី កុំឱ្យធ្វើការផ្លាស់ប្តូរណាមួយលើរដ្ឋាភិបាល ដែលអាចធ្វើឱ្យប្រទេសមានអស្ថិរភាព ខណៈសម្ពាធកើនឡើងខ្លាំងសម្រាប់ស្ថាប័នដែលគ្មានអាណត្តិមួយនេះ ឱ្យឈានទៅរកការបោះឆ្នោតជាលើកដំបូងក្នុងរយៈពេល ១ទសវត្សរ៍។

ក្នុងសេចក្តីថ្លែងការណ៍មួយលើបណ្ដាញសង្គម X ស្ថានទូតសហរដ្ឋអាមេរិក ប្រចាំប្រទេសហៃទី បានសរសេរថា «សហរដ្ឋអាមេរិក នឹងចាត់ទុកថា បុគ្គលណាដែលគាំទ្រដល់គំនិតផ្តួចផ្តើមបង្កអស្ថិរភាពដែលគាំទ្រដល់ក្រុមជនអន្ធពាល គឺជាអ្នកដែលធ្វើសកម្មភាពប្រឆាំងនឹងផលប្រយោជន៍របស់សហរដ្ឋអាមេរិក និងតំបន់ ព្រមទាំងប្រឆាំងប្រជាជនហៃទីទាំងមូល ហើយខ្លួននឹងចាត់វិធានការសមស្របតាមនោះ»។

ស្ថានទូតអាមេរិក បន្ថែមថា ជំហានផ្លាស់ប្ដូរនឹងធ្វើឱ្យប៉ះពាល់ដល់កិច្ចប្រឹងប្រែងក្នុងការបង្កើត «កម្រិតសន្តិសុខ និងស្ថិរភាពអប្បបរមា» នៅហៃទី ជាទីដែលអំពើហិង្សារបស់ក្រុមជនអន្ធពាលប្រដាប់អាវុធកំពុងកើនឡើង និងភាពក្រីក្រកាន់តែធ្ងន់ធ្ងរ។ ការព្រមាននេះបានកើតឡើង ខណៈដែលសមាជិកមួយចំនួននៃក្រុមប្រឹក្សា មានការខ្វែងគំនិតជាមួយនាយករដ្ឋមន្ត្រីហៃទី ប៉ុន្តែគេមិនច្បាស់ទេថាមកពីមូលហេតុអ្វី។ ក្រុមប្រឹក្សានេះបានជួបប្រជុំគ្នាដោយសម្ងាត់ កាលពីព្រឹកថ្ងៃពុធ។

ក្រុមប្រឹក្សានេះគឺជាអាជ្ញាធរកំពូលមួយរបស់ហៃទី ចាប់តាំងពីខែមេសា ឆ្នាំ២០២៤មក និងមានភារកិច្ចតែងតាំងនាយករដ្ឋមន្ត្រី ក្នុងកិច្ចប្រឹងប្រែងនាំមកនូវស្ថិរភាពខ្លះដល់ប្រទេសដែលរួមរឹតដោយហិង្សាក្រុមជនអន្ធពាលមួយនេះ។ ក្រុមប្រឹក្សានេះត្រូវបានកំណត់ឱ្យចុះពីតំណែងនៅថ្ងៃទី៧ ខែកុម្ភៈ ខាងមុខ ក្រោមការសន្មតថា ហៃទីច្បាស់ជានឹងធ្វើការបោះឆ្នោតសកលដើម្បីជ្រើសរើសប្រធានាធិបតីថ្មី ប៉ុន្តែមកទល់បច្ចុប្បន្ន គេមិនច្បាស់ឡើយថាតើរឿងនោះនឹងកើតឡើងដែរឬទេ៕