ប្រធានាធិបតីប្រេស៊ីល លោក Luiz Inacio Lula da Silva កាលពីថ្ងៃអង្គារ បានរិះគន់ប្រធានាធិបតីអាមេរិក លោក ដូណាល់ ត្រាំ ចំពោះការព្យាយាម «គ្រប់គ្រងពិភពលោក» តាមរយៈប្រព័ន្ធផ្សព្វផ្សាយសង្គម។

លោក Lula បាននិយាយនៅក្នុងព្រឹត្តិការណ៍សាធារណៈមួយ នៅទីក្រុងរីអូ ហ្គ្រង់ដេ ( Rio Grande) ដែលជាក្រុងមួយក្នុងរដ្ឋ រីអូ ហ្គ្រង់ដេ ដូ ស៊ុល (Rio Grande do Sul) ភាគខាងត្បូងប្រទេសប្រេស៊ីលថា «តើអ្នកបានកត់សម្គាល់ទេថា លោក ត្រាំ ចង់គ្រប់គ្រងពិភពលោកតាមរយៈប្រព័ន្ធផ្សព្វផ្សាយសង្គម Twitter មែនដែរទេ?»។

លោក បានបន្ថែមថា «លោក ត្រាំ និយាយអ្វីមួយខុសគ្នាជារៀងរាល់ថ្ងៃ។ ពុំមិនអាចទៅរួចទេ។ ហើយតើអ្នកគិតថា វាអាចទៅរួចទេ ក្នុងការប្រព្រឹត្តចំពោះមនុស្សដោយការគោរព ប្រសិនបើយើងមិនមើលមុខពួកគេនោះ? តើគិតថា ពួកគេគឺជាវត្ថុ មិនមែនជាមនុស្សឬ?»

ថ្លែងនៅក្នុងពិធីប្រគល់ផ្ទះចំនួន ១.២៧៦ ខ្នង ដែលជាផ្នែកមួយនៃកម្មវិធីផ្តល់លំនៅឋាន ដែលត្រូវបានគេរំពឹងថា នឹងផ្តល់អត្ថប្រយោជន៍ដល់មនុស្សប្រហែល ៥.000នាក់ នៅភាគខាងត្បូងប្រទេសប្រេស៊ីល លោក Lula បានសំដៅទៅលើលោក ត្រាំ ខណៈពេលដែលកត់សម្គាល់ពីតម្រូវការក្នុងការ «ស្តារមនុស្សធម៌ឡើងវិញ នៅក្នុងទំនាក់ទំនងសង្គម»។

លោកក៏បានជំរុញឲ្យសាធារណជនបញ្ឈប់ការប្រើប្រាស់ទូរស័ព្ទដៃច្រើនពេក និងការពារគោលនយោបាយរបស់លោក ដែលបានចាប់ផ្តើមនៅឆ្នាំ ២០២៤ ដើម្បីហាមឃាត់ការប្រើប្រាស់ទូរស័ព្ទដៃ នៅក្នុងថ្នាក់បឋមសិក្សា និងមធ្យមសិក្សា។

លោកប្រធានាធិបតីប្រេស៊ីល មិនទាន់បានធ្វើអត្ថាធិប្បាយជាសាធារណៈអំពីការអញ្ជើញរបស់លោក ត្រាំ ឲ្យចូលរួមជាមួយនឹងអ្វីដែលហៅថា «ក្រុមប្រឹក្សាសន្តិភាព» ដើម្បីត្រួតពិនិត្យការវិវត្ត នៅក្នុងតំបន់ហ្កាហ្សានៅឡើយទេ៕