លោកប្រធានាធិបតី Donald Trump បាននិយាយនៅថ្ងៃព្រហស្បតិ៍ (២២ មករា) ថា លោកធានាបាននូវសិទ្ធិចូលប្រើប្រាស់នៅកោះហ្រ្គីនលែន (Greenland) ទាំងស្រុងនិងជាអចិន្ត្រៃយ៍ របស់សហរដ្ឋអាមេរិក ក្នុងកិច្ចព្រមព្រៀងជាមួយអង្គការណាតូ ខណៈប្រធានសម្ព័ន្ធយោធានេះបាននិយាយថា សម្ព័ន្ធមិត្តនឹងត្រូវបង្កើនការប្តេជ្ញាចិត្តខ្លួនចំពោះសន្តិសុខអាកទិក ដើម្បីទប់ស្កាត់ការគំរាមកំហែងពីរុស្ស៊ី និងចិន។

ព័ត៌មាននៃកិច្ចព្រមព្រៀងក្របខណ្ឌមួយបានលេចឡើង ខណៈលោក Trump បានដកថយពីការគំរាមកំហែងពន្ធគយប្រឆាំងនឹងអឺរ៉ុប និងបានច្រានចោលការប្រើកម្លាំងដណ្តើមយកកោះហ្រ្គីនលែន ដែលនាំមកនូវភាពធូរស្រាលមួយកម្រិត នៅអ្វីដែលត្រូវបានគេមើលឃើញថា អាចជាការបែកបាក់ដ៏ធំបំផុតក្នុងទំនាក់ទំនងឆ្លងមហាសមុទ្រអាត្លង់ទិកក្នុងពេលជាច្រើនទសវត្សរ៍ ប្រសិនបើពុំមានការបន្ធូរបន្ថយ។

ការផ្លាស់ប្ដូរជំហររបស់លោក Trump បានធ្វើឱ្យទីផ្សារអឺរ៉ុប និងផ្សារហ៊ុនអាមេរិក Wall Street ឈានដល់កម្រិតខ្ពស់។ សេចក្ដីលម្អិតនៃកិច្ចព្រមព្រៀងណាមួយនៅមិនច្បាស់លាស់នោះទេ ហើយដាណឺម៉ាក បានទទូចថា អធិបតេយ្យភាពរបស់ខ្លួនលើកោះនេះ មិនត្រូវបានពិភាក្សាឡើយ។ 

ថ្លែងទៅកាន់អ្នកយកព័ត៌មានពេលលោកត្រឡប់ពីវេទិកាសេដ្ឋកិច្ចពិភពលោក នៅទីក្រុងដាវ៉ូស លោក Trump បាននិយាយថា កិច្ចព្រមព្រៀងថ្មីមួយកំពុងត្រូវបានចរចា ដែលនឹង «ល្អប្រសើរសម្រាប់អាមេរិកខ្លាំងណាស់»។ នៅមុននោះ លោក Trump បានប្រាប់ទូរទស្សន៍ Fox News ថា កិច្ចព្រមព្រៀងនេះនឹងនាំមកនូវ «សិទ្ធចូលប្រើប្រាស់ពេញលេញ គ្មានទីបញ្ចប់ គ្មានដែនកំណត់ពេលវេលានោះទេ» សម្រាប់សហរដ្ឋអាមេរិក៕