ក្រុមសកម្មប្រយុទ្ធប៉ាឡេស្ទីនហាម៉ាសបានយល់ព្រមប្រគល់អាវុធរបស់ខ្លួនជាថ្នូរនឹងការឆ្លងកាត់ដោយសេរីចេញពីតំបន់ហ្កាហ្សាសម្រាប់មេដឹកនាំរបស់ខ្លួន និងការផ្លាស់ប្តូរទៅជាសកម្មភាពនយោបាយតែមួយគត់ នេះបើយោងតាមរបាយការណ៍របស់សារព័ត៌មាន Sky News Arabia។   

លោក Trump បានចេញការទាមទារថ្មីអមដោយភាសាគំរាមឲ្យក្រុមហាម៉ាសរំលាយអាវុធខណៈកិច្ចព្រមព្រៀងបទឈប់បាញ់ដំណាក់កាលទីពីរបានចាប់ផ្ដើម។

ដោយដកស្រង់ប្រភពប៉ាឡេស្ទីនមិនបញ្ចេញឈ្មោះម្នាក់ សារព័ត៌មាននេះបានអះអាងកាលពីថ្ងៃព្រហស្បតិ៍២២មករាសប្ដាហ៍នេះថា ក្រុមហាម៉ាស បានប្រគល់អាវុធ និងផែនទីមួយចំនួននៃបណ្តាញផ្លូវរូងក្រោមដីរបស់ខ្លួនទៅឱ្យអាមេរិករួចហើយ តាមរយៈយន្តការមួយដែលមិនទាន់ត្រូវបានបង្ហាញ។  

ជាថ្នូរនឹងការនេះអាមេរិកបានផ្តល់ការធានាថាក្រុមហាម៉ាសនឹងត្រូវបានអនុញ្ញាតឱ្យចូលរួមក្នុង នយោបាយនៅតំបន់ហ្កាហ្សាហើយមន្ត្រីនិងមន្ត្រីនគរបាលមួយចំនួនរបស់ខ្លួននឹងត្រូវបានអនុញ្ញាតឱ្យធ្វើការឱ្យរដ្ឋបាលថ្មីដរាបណាពួកគេឆ្លងកាត់ការត្រួតពិនិត្យសន្តិសុខអ៊ីស្រាអែល-អាមេរិក។

ប្រភពអះអាងថាមេដឹកនាំរបស់ក្រុមហាម៉ាសនឹងត្រូវបានអនុញ្ញាតឱ្យចាកចេញពីតំបន់ហ្កាហ្សា ដោយអាមេរិកធានាពួកគេថា អ៊ីស្រាអែលនឹងមិនកំណត់គោលដៅពួកគេនៅបរទេសនាពេលអនាគតទេ។

ទាំងក្រុមហាម៉ាស និងសហរដ្ឋអាមេរិក មិនបានធ្វើអត្ថាធិប្បាយលើរបាយការណ៍នេះទេ។ អ៊ីស្រាអែលក៏មិនបានឆ្លើយតបដែរ ប៉ុន្តែប្រភពនោះបាននិយាយថា អ៊ីស្រាអែលមានការសង្ស័យយ៉ាងខ្លាំងអំពីការយោគយល់មួយចំនួន ជាពិសេសឃ្លាដែលអនុញ្ញាតឲ្យក្រុមហាម៉ាសនៅតែមានសកម្មភាពនយោបាយនៅក្នុងតំបន់ហ្កាហ្សា។ ពេញមួយសង្គ្រាមរយៈពេលពីរឆ្នាំរបស់អ៊ីស្រាអែលលើតំបន់នោះ នាយករដ្ឋមន្ត្រី Benjamin Netanyahu បានប្ដេជ្ញាម្តងហើយម្តងទៀតថានឹងកម្ទេចក្រុមហាម៉ាសចោលទាំងស្រុង៕