នៅថ្ងៃសុក្រនេះ នគរបាលអូស្រ្តាលីនិយាយថា ពួកគេបានបង្កើនការតាមស្វែងរកចាប់ខ្លួនខ្មាន់កាំភ្លើងម្នាក់ដែលរងការចោទប្រកាន់ថា បានសម្លាប់ស្រ្តី ២នាក់ និងបុរសម្នាក់ នៅទីក្រុងជនបទ ស្ថិតក្នុងរដ្ឋ New South Wales ដែលជារដ្ឋមានពលរដ្ឋរស់នៅច្រើនបំផុតរបស់អូស្រ្តាលី ។

លោកមេបញ្ជាការ Andrew Holland គឺជានគរបាលតំបន់ភាគខាងលិចរដ្ឋ New South Wales និយាយប្រាប់ក្រុមអ្នកសារព័ត៌មានថា ជនល្មើសរងការចោទប្រកាន់ពុំមានអាជ្ញាប័ណ្ណកាំភ្លើងនោះទេ ហើយនិងបានដាក់ប្រាក់តម្កល់សម្រាប់អំពើហិង្សាក្នុងស្រុក ពេលដែលការវាយប្រហារកើតឡើង ។

នគរបាលនិយាយថា យុវជនអាយុ ១៩ឆ្នាំម្នាក់ បានរងរបួសផងដែរនៅក្នុងការវាយប្រហារកាលពីថ្ងៃព្រហស្បតិ៍ នៅក្នុងទីក្រុង Lake Cargelligo ស្ថិតនៅចម្ងាយប្រហែល ៦១០គ.មភាគខាងលិចទីក្រុងស៊ីដនី ហើយគាត់ត្រូវបានបញ្ជូនទៅកាន់មន្ទីរពេទ្យ ក្នុងស្ថានភាពរបួសធ្ងន់ធ្ងរ ប៉ុន្តែមិនគ្រោះថ្នាក់ដល់អាយុជីវិតនោះទេ ។

សារព័ត៌មានអូស្រ្តាលី រាយការណ៍ថា ជនរងគ្រោះម្នាក់ គឺជាស្រ្តីវ័យ ២៥ឆ្នាំ ដែលប្រហែលជាមានផ្ទៃពោះ ៧ខែ ។

នគរបាលនិយាយថា ប្រតិបត្តិការតាមរកចាប់ខ្លួន ត្រូវបានធ្វើឡើងយ៉ាងខ្លាំងក្លានៅទីក្រុង Lake Cargelligo ដែលមានពលរដ្ឋរស់នៅត្រឹម ១ពាន់នាក់ប៉ុណ្ណោះ ក្នុងនោះក្រុមនគរបាលជំនាញ បានចូលរួមប្រតិបត្តិការតាមប្រម៉ាញ់ចាប់ខ្លួននេះផងដែរ ៕