រុស្ស៊ីបានឲ្យដឹងថា ខ្លួនមិនបានទម្លាក់ចោលការទាមទារដ៏សំខាន់របស់ខ្លួន ដែលឲ្យអ៊ុយក្រែនដកចេញពីតំបន់ Donbas នៅភាគខាងកើតនៃប្រទេសនេះ មុនពេលមានកិច្ចពិភាក្សា ៣ភាគី រវាងមន្ត្រីអ៊ុយក្រែន រុស្ស៊ី និងសហរដ្ឋអាមេរិក នៅអារ៉ាប់រួម នាយប់ថ្ងៃសុក្រ (ទី២៣ ខែមករា ឆ្នាំ២០២៦) នេះ។

ប្រធានាធិបតីអ៊ុយក្រែន លោក Volodymyr Zelensky បាននិយាយថា ទឹកដីនៅតែជាបញ្ហាសំខាន់ ហើយនឹងស្ថិតនៅក្នុងរបៀបវារៈ សម្រាប់ការពិភាក្សានានា។

ការពិភាក្សាត្រីភាគីនេះ មើលទំនងជាការចរចាជាសាធារណៈដោយផ្ទាល់លើកដំបូង រវាងទីក្រុងមូស្គូ និងទីក្រុងគីវ ជុំវិញផែនការដែលត្រូវបានជំរុញដោយប្រធានាធិបតីអាមេរិក លោក Donald Trump ដើម្បីបញ្ចប់សង្គ្រាមរយៈពេលជិត ៤ឆ្នាំ។

ក្រុមកម្រិតខ្ពស់មកពីប្រទេសទាំង៣ បានធ្វើដំណើរទៅកាន់ទីក្រុង Abu Dhabi សម្រាប់ការចរចានេះ ពោលគឺមួយថ្ងៃបន្ទាប់ពីលោក Trump បានជួបជាមួយលោក Zelensky នៅទីក្រុង Davos ប្រទេសស្វីស និងប៉ុន្មានម៉ោងបន្ទាប់ពីតំណាងអាមេរិក លោក Steve Witkoff បានជួបពិភាក្សានាពេលយប់ជាមួយប្រធានាធិបតីរុស្ស៊ី លោក Vladimir Putin នៅវិមានក្រឹមឡាំង។

ទោះបីជាការជំរុញផ្នែកការទូត ដើម្បីបញ្ចប់ជម្លោះដ៏អាក្រក់បំផុតរបស់អឺរ៉ុប ចាប់តាំងពីសង្គ្រាមលោកលើកទី២ បានកើនឡើងក្នុងសប្តាហ៍ថ្មីៗនេះក៏ដោយ ក៏ទីក្រុងមូស្គូ និងគីវ នៅតែមានជម្លោះលើបញ្ហាសំខាន់ ពាក់ព័ន្ធនឹងដែនដី នៅក្នុងការដោះស្រាយក្រោយសង្គ្រាម។

ហើយរុស្ស៊ី ដែលបានចាប់ផ្តើមការឈ្លានពានរបស់ខ្លួន នៅឆ្នាំ២០២២ បានបញ្ជាក់កាលពីថ្ងៃទី២៣ ខែមករាថា ខ្លួនមិនបានទម្លាក់ចោលការទាមទារដ៏ធំបំផុតរបស់ខ្លួនដែលឲ្យទីក្រុងគីវដកចេញពីតំបន់ Donbas ភាគខាងកើតនោះទេ ជាលក្ខខណ្ឌដែលអ៊ុយក្រែនបានចាត់ទុកថា មិនអាចទទួលយកបាន៕