រដ្ឋាភិបាលបារាំងបានរួចផុតពីការបោះឆ្នោតដកទុកសេចក្ដីចិត្តលើកទី១ ក្នុងចំណោមការបោះឆ្នោត ២លើក នៅរដ្ឋសភា ដែលត្រូវបានលើកឡើង ដោយសារការសម្រេចឲ្យក្លាយជាច្បាប់យ៉ាងប្រញាប់ប្រញាល់លើផ្នែកចំណូលនៃកញ្ចប់ថវិកាឆ្នាំ២០២៦ ដោយមិនផ្តល់សិទ្ធិសម្រេចចុងក្រោយដល់រដ្ឋសភា។

សមាជិកសភាសរុបចំនួន ២៦៩រូប បានបោះឆ្នោតគាំទ្រញត្តិដកសេចក្ដីទុកចិត្តនេះ ដែលត្រូវបានស្នើឡើងដោយគណបក្សឆ្វេងនិយមជ្រុលបារាំង La France Insoumise (LFI) រួមជាមួយគណបក្សបៃតង (LV) និងកម្មុយនីស្ត (PCF)។ សំឡេងគាំទ្រចំនួន ២៨៨ ត្រូវការចាំបាច់ ដើម្បីផ្តួលរំលំរដ្ឋាភិបាល។

ការបោះឆ្នោតលើកទី២ នឹងកើតមានឡើងបន្ទាប់ភ្លាមៗ។ ប្រសិនបើការបោះឆ្នោតនោះមិនជោគជ័យដូចគ្នាដែរ នាយករដ្ឋមន្ត្រី លោក Sebastien Lecornu នឹងប្រើប្រាស់មាត្រា ៤៩.៣ នៃរដ្ឋធម្មនុញ្ញម្តងទៀត ដើម្បីជំរុញផ្នែកចំណាយនៃកញ្ចប់ថវិកានេះក្លាយជាច្បាប់ដោយមិនចាំបាច់មានការបោះឆ្នោត នៅសភា ជាចំណាត់ការមួយដែលស្ទើរតែប្រាកដណាស់ នឹងនាំឲ្យមានការបោះឆ្នោតដកសេចក្ដីទុកចិត្តបន្ថែមទៀត។

រដ្ឋាភិបាលរបស់លោកប្រធានាធិបតី Emmanuel Macron កំពុងគេចពីដំណើរការនៅសភា បន្ទាប់ពីការចរចាអស់រយៈពេលជាច្រើនខែ មិនអាចធ្វើឲ្យមានការអនុម័ត លើសេចក្តីព្រាងច្បាប់ហិរញ្ញវត្ថុកាត់បន្ថយឱនភាព ដែលនឹងអនុម័តនៅក្នុងសភាជាន់ទាប ជាកន្លែងដែលគ្មានគណបក្សណាមួយ មានសំឡេងភាគច្រើននោះឡើយ។

ក្នុងការកិច្ចប្រឹងប្រែង ដើម្បីឲ្យច្បាប់ថវិកានេះក្លាយជាច្បាប់ជាធរមាន លោក Macron បានបាត់បង់រដ្ឋាភិបាលចំនួន ២ ហើយបានឃើញប្រទេសបារាំងធ្លាក់ចូលទៅក្នុងភាពចលាចល ដែលកម្រកើតមាន ចាប់តាំងពីការបង្កើតសាធារណរដ្ឋទី៥ (Fifth Republic) ក្នុងឆ្នាំ១៩៥៨ ដែលជាប្រព័ន្ធរដ្ឋាភិបាលបច្ចុប្បន្ន៕