អាល់បានី៖ ក្រុមបាតុករបានដើរដង្ហែឆ្លងកាត់រដ្ឋធានី Tirana របស់ប្រទេសអាល់បានីកាលពីថ្ងៃសុក្រ និងបានព្យាយាមបិទផ្លូវក្នុងទីក្រុងផ្សេងទៀតនៅក្នុងថ្ងៃទី៣ នៃការតវ៉ាប្រឆាំងទៅនឹងការឡើងថ្លៃទំនិញនាពេលថ្មីៗនេះ ដែលអាជ្ញាធរបានដាក់កំហុសលើសង្គ្រាមនៅក្នុងប្រទេសអ៊ុយក្រែន។
រដ្ឋាភិបាលរបស់នាយករដ្ឋមន្ត្រី Edi Rama បានដាក់ការគ្រប់គ្រងតម្លៃលើប្រេងឥន្ធនៈ និងបានជំរុញឱ្យប្រជាជនអាល់បានីប្រើប្រាស់រថយន្តរបស់ពួកគេតិចជាងមុន បន្ទាប់ពីតម្លៃប្រេងឥន្ធនៈបានកើនឡើង ៥០% កាលពីសប្តាហ៍មុន។ មនុស្សរាប់រយនាក់បានតវ៉ាដោយសន្តិវិធីប្រហែល ២ម៉ោងនៅខាងក្រៅការិយាល័យរបស់លោក Rama ក្នុងទីក្រុង Tirana កាលពីថ្ងៃសុក្រ មុនពេលបន្តដំណើរទៅកាន់ទីលាន Skanderbeg ក្នុងទីក្រុងដែលមនុស្សជាច្រើនបានអង្គុយតវ៉ា។
នគរបាលបានរារាំងបាតុករមិនឱ្យបិទផ្លូវធំៗ។ យ៉ាងហោចណាស់នៅក្នុងទីក្រុងចំនួន ៦ផ្សេងទៀតក្រុមអ្នកតវ៉ាបានបិទផ្លូវ ហើយក្នុងករណីខ្លះមានការប៉ះទង្គិចជាមួយនគរបាល ដែលបានឃាត់ខ្លួនមនុស្សជាច្រើននាក់។ ការឡើងថ្លៃប្រេងឥន្ធនៈបានជះឥទ្ធិពលលើតម្លៃម្ហូបអាហារ នៅក្នុងប្រទេសតូចមួយនៅតំបន់បាល់កង់មួយនេះ។ ក្រុមអ្នកតវ៉ាចោទរដ្ឋាភិបាលថា បានចំណេញពីការឡើងថ្លៃនេះដោយការមិនកាត់បន្ថយពន្ធ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
