យោធាសហរដ្ឋអាមេរិកបាននិយាយថា ខ្លួនបានសម្លាប់អ្នកជួញដូរគ្រឿងញៀនពីរនាក់ដែលត្រូវបានចោលប្រកាន់ នៅក្នុងការវាយប្រហារទៅលើទូកមួយគ្រឿងនៅមហាសមុទ្រប៉ាស៊ីហ្វិកខាងកើតកាលពីថ្ងៃសុក្រ ទី ២៣ ខែមករា ខណៈឆ្មាំល្បាតឆ្នេរកំពុងស្វែងរកមនុស្សទីបីដែលនៅរស់ជីវិត។

ទីបញ្ជាការភាគខាងត្បូងសហរដ្ឋអាមេរិក បាននិយាយនៅក្នុងការបង្ហោះនៅលើបណ្តាញ X ដែលរួមមានឃ្លីបវីដេអូនៃទូកម៉ាស៊ីនមួយគ្រឿងដែលត្រូវបានបំផ្លាញដោយការបំផ្ទុះ ថា ចារកម្មបានបញ្ជាក់ថា ទូកនេះ កំពុងធ្វើដំណើរឆ្លងកាត់ផ្លូវជួញដូរគ្រឿងញៀននៅមហាសមុទ្រប៉ាស៊ីហ្វិកភាគខាងកើត និងបានពាក់ព័ន្ធក្នុងប្រតិបត្តិការជួញដូរគ្រឿងញៀន។

មនុស្សបីនាក់អាចមើលឃើញនៅក្នុងវីដេអូ មុនពេលការវាយប្រហារ ហើយទីបញ្ជាការភាគខាងត្បូងសហរដ្ឋអាមេរិក បាននិយាយថា ខ្លួនបានផ្តល់ព័ត៌មានដល់ឆ្មាំល្បាតឆ្នេរសហរដ្ឋអាមេរិកភ្លាមៗ ឱ្យស្វែងរកអ្នកដែលនៅរស់ជីវិតម្នាក់។ 

រដ្ឋបាលរបស់ប្រធានាធិបតី Donald Trump បានចាប់ផ្តើមកំណត់គោលដៅលើទូករត់ពន្ធដែលត្រូវបានចោទប្រកាន់នៅដើមខែកញ្ញា ដោយទទូចថាខ្លួនកំពុងធ្វើសង្គ្រាមជាមួយក្រុម «ភេរវករគ្រឿងញៀន» ដែលត្រូវបានចោទប្រកាន់ថាកំពុងធ្វើប្រតិបត្តិការចេញពីប្រទេសវ៉េណេស៊ុយអេឡា។