ប្រភពព័ត៌មានចំនួន៤ បានប្រាប់សារព័ត៌មានរ៉យទ័រថា ទីក្រុងវ៉ាស៊ីនតោន បានគំរាមកំហែងបណ្ដាអ្នកនយោបាយជាន់ខ្ពស់របស់អ៊ីរ៉ាក់ ជាមួយនឹងទណ្ឌកម្មធ្ងន់ៗដែលផ្តោតលើរដ្ឋអ៊ីរ៉ាក់ រួមទាំងប្រាក់ចំណូលប្រេងដ៏សំខាន់របស់ខ្លួនផងដែរ ប្រសិនបើក្រុមប្រដាប់អាវុធដែលគាំទ្រដោយអ៊ីរ៉ង់ ត្រូវបានបញ្ចូលទៅក្នុងរដ្ឋាភិបាលបន្ទាប់។

ការព្រមាននេះគឺជាឧទាហរណ៍ដ៏ច្បាស់លាស់បំផុតនៃយុទ្ធនាការរបស់លោកប្រធានាធិបតីអាមេរិក Donald Trump ដើម្បីទប់ស្កាត់ឥទ្ធិពលរបស់ក្រុមដែលមានទំនាក់ទំនងជាមួយអ៊ីរ៉ង់ នៅក្នុងប្រទេសអ៊ីរ៉ាក់ ដែលកំពុងរងសម្ពាធរវាងសម្ព័ន្ធមិត្តជិតស្និទ្ធបំផុតពីររបស់ខ្លួនជាយូរមកហើយគឺទីក្រុងវ៉ាស៊ីនតោន និងទីក្រុងតេអេរ៉ង់។

យោងតាមមន្ត្រីអ៊ីរ៉ាក់បានឱ្យដឹងថា ការព្រមានរបស់សហរដ្ឋអាមេរិក ត្រូវបានធ្វើឡើងម្តងហើយម្តងទៀតក្នុងពេលពីរខែកន្លងមកនេះ ដោយភារធារីសហរដ្ឋអាមេរិក ប្រចាំទីក្រុងបាកដាដ លោក Joshua Harris ក្នុងការសន្ទនាជាមួយមន្ត្រីអ៊ីរ៉ាក់ និងមេដឹកនាំនិកាយស៊ីអ៊ីតដ៏មានឥទ្ធិពល ហើយសារទាំងនេះក៏បានបញ្ចូនទៅកាន់មេដឹកនាំក្រុមដែលមានទំនាក់ទំនងនឹងអ៊ីរ៉ង់ មួយចំនួនផងដែរ។ 

ប្រភពសង្កត់ធ្ងន់ថា សារនេះផ្តោតលើសមាជិកសភាចំនួន ៥៨រូប ដែលអាមេរិកយល់ថា មានទំនាក់ទំនងជាមួយអ៊ីរ៉ង់ ហើយថា ទីក្រុងវ៉ាស៊ីនតោន នឹងផ្អាកការចូលរួមជាមួយរដ្ឋាភិបាលថ្មី ប្រសិនបើសមាជិកសភាណាម្នាក់ក្នុងចំណោមអ្នកទាំង ៥៨រូបនោះ ត្រូវបានតំណាងនៅក្នុងគណៈរដ្ឋមន្ត្រីអ៊ីរ៉ាក់។

ចាប់តាំងពីឡើងកាន់តំណែងកាលពីឆ្នាំមុន លោក Trump បានចាត់វិធានការធ្វើឱ្យរដ្ឋាភិបាលអ៊ីរ៉ង់ចុះខ្សោយ រួមទាំងតាមរយៈប្រទេសជិតខាងរបស់ខ្លួនគឺអ៊ីរ៉ាក់ផងដែរ៕