ការវាយប្រហារឥតឈប់ឈររបស់រុស្ស៊ី លើអ៊ុយក្រែន បានបណ្ដាលឱ្យមនុស្សស្លាប់និងរបួសជាច្រើនកាលពីយប់ថ្ងៃសុក្រ រហូតដល់ថ្ងៃសៅរ៍ (២៤ មករា) នេះ ខណៈក្រុមអ្នកចរចាមកពីអ៊ុយក្រែន រុស្ស៊ី និងសហរដ្ឋអាមេរិក ត្រៀមជួបប្រជុំគ្នាសម្រាប់កិច្ចពិភាក្សាត្រីភាគី នៅទីក្រុងអាប៊ូដាប៊ី សម្រាប់ថ្ងៃទីពីរនៃកិច្ចចរចា ដើម្បីបញ្ចប់ប្រតិបត្តិការយោធាទ្រង់ទ្រាយធំជិត ៤ឆ្នាំរបស់រុស្ស៊ី។

លោក Tymur Tkachenko ប្រធានរដ្ឋបាលយោធាក្រុងគីវបាននិយាយថា ការវាយប្រហារដោយយានដ្រូនលើរដ្ឋធានីអ៊ុយក្រែនមួយនេះ បានបង្កការស្លាប់និងរបួសមួយចំនួន។ លោក Vitali Klitschko អភិបាលក្រុងគីវ បាននិយាយថា អគារជិត ៦.០០០ខ្នងនៅក្នុងរដ្ឋធានីគីវ ពុំមានថាមពលកម្ដៅប្រើប្រាស់នោះទេ បន្ទាប់ពីការវាយប្រហាររបស់រុស្ស៊ី ពេញមួយយប់។ នៅព្រឹកថ្ងៃសៅរ៍នេះ សីតុណ្ហភាពនៅទីក្រុងគីវ មានកម្រិត -១២ អង្សាសេដ៏ត្រជាក់។

អភិបាលក្រុង Kharkiv លោក Ihor Terekhov បាននិយាយនៅថ្ងៃសៅរ៍នេះថា នៅក្នុងទីក្រុងធំទីពីររបស់អ៊ុយក្រែន គឺទីក្រុង Kharkiv បានរងការវាយប្រហារដោយយានដ្រូន ដែលធ្វើឱ្យមនុស្សរាប់សិបនាក់រងរបួស។ ការវាយប្រហារទាំងនេះបានកើតឡើង ខណៈក្រុមប្រេសិត ត្រូវបានរំពឹងថា នឹងជួបគ្នានៅក្នុងអារ៉ាប់រួម សម្រាប់កិច្ចពិភាក្សាថ្ងៃទីពីរនៅថ្ងៃសៅរ៍ដដែលនេះ។

កិច្ចចរចាទាំងនេះ គឺជាព្រឹត្តិការណ៍ដំបូងបំផុតដែលគេបានដឹង ដោយក្រុមមន្ត្រីមកពីរដ្ឋបាលអាមេរិក បានអង្គុយចរចាជាមួយប្រទេសទាំងពីរ ដើម្បីជាផ្នែកមួយនៃការជំរុញរបស់ទីក្រុងវ៉ាស៊ីនតោន ឱ្យមានវឌ្ឍនភាពឆាប់រហ័ស ក្នុងការបញ្ចប់ប្រតិបត្តិការយោធាជិត ៤ ឆ្នាំរបស់ទីក្រុងមូស្គូ។ ក្រសួងការបរទេសអារ៉ាប់រួម និយាយថា កិច្ចពិភាក្សាទាំងនេះគឺជាផ្នែកមួយនៃកិច្ចប្រឹងប្រែង «ដើម្បីលើកកម្ពស់ការសន្ទនា និងកំណត់ដំណោះស្រាយនយោបាយចំពោះវិបត្តិនេះ»។ សេតវិមានបានពណ៌នាថ្ងៃប្រជុំដំបូងនៅថ្ងៃសុក្រថា មានផលិតភាពណាស់៕