រដ្ឋាភិបាលស៊ីរី និងកងកម្លាំងឃឺដ កាលពីថ្ងៃសៅរ៍ (ទី២៥ ខែមករា ឆ្នាំ២០២៦) បានបន្តបទឈប់បាញ់រយៈពេល ១៥ថ្ងៃទៀត ដោយទីក្រុងដាម៉ាស បានឲ្យដឹងថា ខ្លួននឹងគាំទ្រដល់ការផ្ទេរអ្នកទោសរបស់ក្រុមរដ្ឋឥស្លាម (ISIS) ពីប្រទេសស៊ីរីទៅអ៊ីរ៉ាក់ ដែលធ្វើឡើងដោយសហរដ្ឋអាមេរិក។

ប្រភពជាច្រើនបានប្រាប់សារព័ត៌មាន AFP នៅមុននេះថា បទឈប់បាញ់នឹងត្រូវបានបន្ត ដោយមន្ត្រីស៊ីរីម្នាក់ នៅទីក្រុងដាម៉ាស បានដកស្រង់ហេតុផលដូចគ្នា។ តាមរយៈសេចក្តីថ្លែងការណ៍មួយ ក្រសួងការពារជាតិស៊ីរី បានឲ្យដឹងថា ការបន្តរយៈពេល ១៥ថ្ងៃនេះ នឹងចូលជាធរមាននៅម៉ោង ១១យប់ ម៉ោងក្នុងស្រុក (ត្រូវនឹងម៉ោង ២០ ម៉ោងសកល) នាថ្ងៃសៅរ៍។

ដោយសំដៅទៅលើកងកម្លាំងប្រជាធិបតេយ្យស៊ីរី (SDF) ដឹកនាំដោយជនជាតិឃឺដ សេចក្តីថ្លែងការណ៍នេះបានបន្ថែមថា៖ «ការបន្តបទឈប់បាញ់នេះ គឺដើម្បីគាំទ្រដល់ប្រតិបត្តិការរបស់អាមេរិក ក្នុងការផ្ទេរអ្នកទោសរបស់រដ្ឋឥស្លាម ISIS ពីពន្ធនាគាររបស់ក្រុម SDF ទៅកាន់ប្រទេសអ៊ីរ៉ាក់»។

ក្រុម SDF ក៏បានបញ្ជាក់ពីការបន្តនេះផងដែរ ដោយប្រាប់ថា វាត្រូវបានឈានដល់ «តាមរយៈការសម្របសម្រួលជាអន្តរជាតិ ខណៈពេលដែលការសន្ទនាជាមួយទីក្រុងដាម៉ាសនៅតែបន្តមាន»។

គួរបញ្ជាក់ថា កាលពីថ្ងៃអង្គារ ទីក្រុងដាម៉ាស និងក្រុម SDF ដំបូងឡើយបានព្រមព្រៀងគ្នាលើបទឈប់បាញ់រយៈពេល ៤ថ្ងៃ បន្ទាប់ពីកងកម្លាំងឃឺដ បានប្រគល់ដែនដីដ៏ធំទៅឲ្យកងទ័ពរដ្ឋាភិបាលដែលបានបញ្ជូនកម្លាំងបន្ថែមទៀតផងដែរ ទៅកាន់បន្ទាយមួយរបស់កងកម្លាំងឃឺដ នៅភាគឦសាន៕