ប្រធានាធិបតីគុយបា លោក Miguel Diaz-Canel បាននិយាយការពារសមយុទ្ធយោធាត្រៀមលក្ខណៈរបស់ប្រទេសលោក ដែលបានធ្វើឡើងកាលពីថ្ងៃសោរ៍ (ទី២៤ ខែមករា ឆ្នាំ២០២៦) ដោយចាត់ជាការរារាំងប្រឆាំងនឹងការឈ្លានពានដែលអាចកើតមានពីសហរដ្ឋអាមេរិក។

ប្រធានាធិបតីអាមេរិក លោក Donald Trump នៅក្នុងខែមករានេះ បានព្រមានថា គុយបា «ត្រៀមដួលរលំហើយ» ហើយបានប្រាប់ទីក្រុងឡាហាវ៉ាន (Havana) ឲ្យ «ធ្វើកិច្ចព្រមព្រៀង« ឬបើមិនដូច្នោះទេ នឹងទទួលផលស្រដៀងគ្នានឹងប្រទេសវ៉េណេស៊ុយអេឡា ដែលមេដឹកនាំធ្លាក់ពីតំណែង គឺលោក Nicolas Maduro ត្រូវបានកងកម្លាំងអាមេរិកនាំទៅសហរដ្ឋអាមេរិក អំឡុងការវាយឆ្មក់កាលថ្ងៃទី៣ ខែមករា ជាហេតុការន៍ដែលបានសម្លាប់មនុស្សរាប់សិបនាក់។

វ៉េណេស៊ុយអេឡា គឺជាសម្ព័ន្ធមិត្តដ៏សំខាន់របស់ប្រទេសគុយបា និងជាអ្នកផ្គត់ផ្គង់ប្រេង និងប្រាក់ដ៏សំខាន់ ដែលលោក Trump បានសន្យាថា នឹងកាត់ផ្តាច់ឲ្យបាន។

កាលថ្ងៃទី២៤ ខែមករា លោក Diaz-Canel បានត្រួតពិនិត្យសមយុទ្ធយោធា ដែលរួមមានអង្គភាពរថក្រោះពីកងកម្លាំងប្រដាប់អាវុធគុយបា។ លោកត្រូវបានអមដំណើរដោយឧត្តមសេនីយ៍គុយបា លោក Alvaro Lopez Miera ដែលជារដ្ឋមន្ត្រីកងកម្លាំងប្រដាប់អាវុធ និងមន្ត្រីយោធាជាន់ខ្ពស់ផ្សេងទៀត។

តាមរយៈសុន្ទរកថាដែលត្រូវបានចាក់ផ្សាយតាមទូរទស្សន៍គុយបា លោក Diaz-Canel បានលើកឡើងថា៖ «វិធីល្អបំផុត ដើម្បីទប់ស្កាត់ការឈ្លានពាន គឺត្រូវធ្វើឲ្យចក្រពត្តិនិយមដឹងពីខាតបង់យ៉ាងធ្ងន់ធ្ងរ ដោយសារការវាយប្រហារមកលើប្រទេសរបស់យើង។ លោកបានបន្ថែមថា៖ «ហើយនោះត្រូវមានការងារជាច្រើន ដើម្បីឲ្យយើងរៀបចំនូវសកម្មភាពយោធាប្រភេទនេះ។ ការរៀបចំនេះមានសារៈសំខាន់យ៉ាងខ្លាំងនៅក្នុងកាលៈទេសៈបច្ចុប្បន្ន»។

យោងតាមសេចក្តីថ្លែងការណ៍ផ្លូវការរបស់រដ្ឋាភិបាល ក្រុមប្រឹក្សាការពារជាតិគុយបា ដែលដឹកនាំដោយលោក Diaz-Canel ថ្មីៗនេះ បានជួបប្រជុំគ្នា «ដោយមានគោលបំណងបង្កើន និងកែលម្អកម្រិតនៃការត្រៀមខ្លួន និងការរួបរួម» ក្នុងចំណោមថ្នាក់ដឹកនាំរបស់ប្រទេស៕