ក្រុមនាវាផ្ទុកយន្តហោះវាយប្រហាររបស់សហរដ្ឋអាមេរិក កំពុងធ្វើដំណើរឆ្ពោះទៅកាន់ឈូងសមុទ្រ ខណៈភាពតានតឹងកើនឡើងជាមួយអ៊ីរ៉ង់។ យោធាអាមេរិក ត្រូវបានបង្កើនដ៏សំខាន់នៅតំបន់មជ្ឈិមបូព៌ានៅក្នុងខែមិថុនា ប៉ុន្មានថ្ងៃមុនពេលវាយប្រហារទីតាំងនុយក្លេអ៊ែរអ៊ីរ៉ង់ចំនួនបីកន្លែងក្នុងអំឡុងពេលសង្គ្រាមរយៈពេល១២ថ្ងៃរបស់អ៊ីស្រាអែលជាមួយទីក្រុងតេអេរ៉ង់។ ក្នុងខែនេះ ប្រធានាធិបតីសហរដ្ឋអាមេរិក លោក Donald Trump បានគាំទ្រក្រុមបាតុករប្រឆាំងរដ្ឋាភិបាលនៅអ៊ីរ៉ង់។

លោកបានប្រាប់ពួកគេថា «ជំនួយនឹងទៅដល់» ខណៈរដ្ឋាភិបាលបានបង្ក្រាប។ ប៉ុន្តែកាលពីសប្តាហ៍មុន លោកបាននិយាយសម្រាលពីវោហាសាស្ត្រផ្នែកយោធា។ ដូច្នេះ តើយុទ្ធោបករណ៍សហរដ្ឋអាមេរិកអ្វីខ្លះដែលកំពុងដឹកជញ្ជូនទៅកាន់ឈូងសមុទ្រ? ហើយថាតើសហរដ្ឋអាមេរិកកំពុងរៀបចំវាយប្រហារអ៊ីរ៉ង់ម្តងទៀតដែរឬទេ? លោក Trump បាននិយាយថា «កងនាវាចម្បាំង» របស់សហរដ្ឋអាមេរិកកំពុងធ្វើដំណើរឆ្ពោះទៅកាន់តំបន់ឈូងសមុទ្រ ដោយអ៊ីរ៉ង់ជាចំណុចគោលដៅចម្បងរបស់ខ្លួន។

មន្ត្រីអាមេរិកនិយាយថា ក្រុមនាវាផ្ទុកយន្តហោះវាយប្រហារ និងយុទ្ធោបករណ៍ផ្សេងទៀតនឹងទៅដល់តំបន់មជ្ឈិមបូព៌ាក្នុងរយៈពេលប៉ុន្មានថ្ងៃខាងមុខនេះ ហើយ «យើងកំពុងតាមដានអ៊ីរ៉ង់។ យើងមានកងកម្លាំងដ៏ធំ កំពុងធ្វើដំណើរឆ្ពោះទៅកាន់ប្រទេសអ៊ីរ៉ង់»។ នាវាផ្ទុកយន្តហោះ Abraham Lincoln បានផ្លាស់ប្តូរផ្លូវរបស់វាពីសមុទ្រចិនខាងត្បូងកាលពីជាងមួយសប្តាហ៍កន្លងទៅនេះឆ្ពោះទៅកាន់មជ្ឈិមបូព៌ា។ ក្រុមនាវាផ្ទុកយន្តហោះវាយប្រហាររបស់ខ្លួន រួមមាននាវាពិឃាត Arleigh Burke បំពាក់ដោយមីស៊ីលស៊ីបគោលដៅ Tomahawk មានសមត្ថភាពវាយប្រហារគោលដៅជ្រៅទៅក្នុងប្រទេសអ៊ីរ៉ង់។ នាវាយោធាអាមេរិកដែលកំពុងធ្វើដំណើរទៅកាន់មជ្ឈិមបូព៌ាក៏ត្រូវបានបំពាក់ដោយប្រព័ន្ធប្រយុទ្ធ Aegis ដែលផ្តល់ការការពារដែនអាកាស និងមីស៊ីល ប្រឆាំងនឹងមីស៊ីលបាលីស្ទីក និងមីស៊ីលស៊ីបគោលដៅ និងការគំរាមកំហែងតាមអាកាសផ្សេងទៀត។