អាជ្ញាធរអូស្ត្រាលី នៅថ្ងៃចន្ទ (២៦ មករា) នេះ បានចេញការព្រមានពីរលកកម្ដៅសម្រាប់តំបន់ភាគច្រើននៃប្រទេស រួមទាំងលទ្ធភាពនៃចំហេះព្រៃដ៏គ្រោះថ្នាក់បំផុត ខណៈមនុស្សរាប់លាននាក់កំពុងប្រារព្ធទិវាអូស្ត្រាលី។ ការិយាល័យឧតុនិយមនិយាយថា សីតុណ្ហភាពត្រូវបានរំពឹងថា នឹងឡើងដល់កម្រិតកំពូលនៅថ្ងៃអង្គារ ទី២៧ ខែមករា ដោយឈានដល់ «កម្រិតខ្ពស់ខ្ទង់ ៤០ អង្សាសេ» នៅរដ្ឋភាគខាងត្បូងដូចជារដ្ឋ Victoria និងរដ្ឋ South Australia។

យោងតាមការិយាល័យនេះ សីតុណ្ហភាពកាលពីថ្ងៃអាទិត្យកន្លងទៅ នៅរដ្ឋ South Australia មើលឃើញកំណត់ត្រា ៤៨,៥អង្សាសេ ហើយការព្រមានពីគ្រោះថ្នាក់ចំហេះក្នុងតំបន់មួយចំនួននៃប្រទេសក៏ត្រូវបានដាក់ចេញផងដែរ។ ក្រៅពីរដ្ឋ Victoria និងរដ្ឋ South Australia ការព្រមានពីរលកកម្តៅក៏ត្រូវដាក់ចេញក្នុងរដ្ឋផ្សេងទៀត ដូចជារដ្ឋ New South Wales និងរដ្ឋ Queensland ជាដើម។

សេចក្ដីព្រមានទាំងនេះនឹងនៅតែមានសុពលភាពរហូតដល់ថ្ងៃពុធ ពាក់កណ្ដាលសប្ដាហ៍នេះ។ ស្នងការគ្រប់គ្រងគ្រោះមហន្តរាយរបស់រដ្ឋ Victoria បានប្រាប់សារព័ត៌មាន ABC ថា «គ្រប់គ្នាមិនធ្លាប់បានឃើញស្ថានភាពរលកកម្ដៅបែបនេះនៅក្នុងរដ្ឋ Victoria ទេ អស់រយៈពេលជិត ២០មកហើយ»។

នៅថ្ងៃចន្ទនេះ ការិយាល័យឧតុនិយមបានព្រមានពី «គ្រោះថ្នាក់នៃចំហេះព្រៃយ៉ាងធ្ងន់ធ្ងរ» នៅទូទាំងផ្នែកខ្លះនៃរដ្ឋ South Australia និងភាគច្រើននៃភាគនិរតីរដ្ឋ Victoria «ដោយសារតែអាកាសធាតុក្តៅខ្លាំង និងស្ងួតហួតហែង រួមផ្សំជាមួយនឹងខ្យល់បក់ពីកម្រិតមធ្យមទៅខ្លាំង»។ ហានិភ័យថ្មីនេះ បានកើតឡើងស្របពេលចំហេះព្រៃបច្ចុប្បន្នដែលឆាបឆេះអស់ជាច្រើនថ្ងៃមកហើយនៅរដ្ឋ Victoria មិនទាន់រលត់ទាំងស្រុងនោះទេ ដោយក្រុមពន្លត់អគ្គិភ័យកំពុងបន្តទប់ស្កាត់អណ្តាតភ្លើង ដែលបានជំរុញឱ្យមានការជម្លៀសចេញ និងគំរាមកំហែងដល់ទ្រព្យសម្បត្តិ៕