កងទ័ពអាកាសអាមេរិក កាលពីថ្ងៃអាទិត្យ (ទី២៥ ខែមករា ឆ្នាំ២០២៦) បានឲ្យដឹងថា ខ្លួនជិតចាប់ផ្តើមសមយុទ្ធត្រៀមលក្ខណៈរយៈពេលច្រើនថ្ងៃ នៅទូទាំងតំបន់មជ្ឈិមបូព៌ា «ដើម្បីបង្ហាញពីសមត្ថភាព ក្នុងការដាក់ពង្រាយ បំបែក និងគាំទ្រកម្លាំងទ័ពអាកាសប្រយុទ្ធ» នៅក្នុងតំបន់ ស្របពេលភាពតានតឹងមានកាន់តែខ្លាំងឡើងៗជាមួយអ៊ីរ៉ង់។

សេចក្តីថ្លែងការណ៍មួយដែលចេញផ្សាយដោយកងកម្លាំងទ័ពអាកាសកណ្តាលអាមេរិក (AFCENT) បានឲ្យដឹងថា៖ «សមយុទ្ធនេះពង្រឹងសន្តិភាពតាមរយៈការបង្ហាញកម្លាំងដោយការដាក់បញ្ចូលធនធានដែលអាចទុកចិត្តបាន ត្រៀមខ្លួនប្រយុទ្ធ និងវត្តមានប្រកបដោយទទួលខុសត្រូវ ដែលត្រូវបានរៀបចំឡើង ដើម្បីទប់ស្កាត់ការវាយប្រហារ កាត់បន្ថយហានិភ័យនៃការប៉ាន់ស្មានខុស និងធានាដល់ដៃគូ»។

ភាពតានតឹង រវាងសហរដ្ឋអាមេរិក និងអ៊ីរ៉ង់ បានកើនឡើងយ៉ាងខ្លាំង បន្ទាប់ពីមានការបង្ក្រាបដ៏សាហាវលើការតវ៉ាទូទាំងប្រទេស ដែលបានឃើញថា មនុស្សរាប់ពាន់នាក់ត្រូវបានសម្លាប់ ហើយរាប់ម៉ឺននាក់ត្រូវបានចាប់ខ្លួន។ ប្រធានាធិបតីអាមេរិក Donald Trump បានគំរាមកំហែងចាត់វិធានការយោធា ប្រសិនបើអ៊ីរ៉ង់បន្តសម្លាប់អ្នកតវ៉ាដោយសន្តិវិធី ឬអនុវត្តការប្រហារជីវិតយ៉ាងច្រើនលើអ្នកដែលត្រូវបានឃុំខ្លួន។

រឿងនេះក៏កើតឡើងផងដែរ នៅពេលដែលនាវាផ្ទុកយន្តហោះ USS Abraham Lincoln និងនាវាចម្បាំងអមដំណើរផ្សេងទៀតកំពុងឆ្ពោះទៅតំបន់នេះ។ លោក Trump បានបញ្ជាក់ថា នាវាទាំងនោះកំពុងត្រូវបានបម្លាស់ទី «ក្នុងករណី» ដែលលោកសម្រេចចិត្តចាត់វិធានការ។

ទីបញ្ជាការកណ្តាលសហរដ្ឋអាមេរិក បានឲ្យដឹងនៅលើបណ្ដាញសង្គមថា យន្តហោះចម្បាំង F-15E Strike Eagle របស់កងទ័ពអាកាសខ្លួន ឥឡូវនេះ មានវត្តមាននៅតំបន់មជ្ឈិមបូព៌ា ដោយកត់សម្គាល់ថា យន្តហោះចម្បាំងនេះ «បង្កើនការត្រៀមខ្លួនប្រយុទ្ធ ហើយលើកកម្ពស់សន្តិសុខ និងស្ថិរភាព ក្នុងតំបន់»៕