ប្រធានាធិបតីស្តីទីនៃប្រទេសវ៉េណេស៊ុយអេឡា លោកស្រី Delcy Rodriguez បាននិយាយកាលពីថ្ងៃអាទិត្យថា ភាពខ្វែងគំនិតគ្នាជាមួយសហរដ្ឋអាមេរិក នឹងត្រូវបានដោះស្រាយតាមរយៈបណ្តាញការទូត។

ថ្លែងនៅក្នុងព្រឹត្តិការណ៍មួយជាមួយកម្មករប្រេង នៅរោងចក្រចម្រាញ់ប្រេង Puerto La Cruz នៅភាគឦសាននៃប្រទេសវ៉េណេស៊ុយអេឡា លោកស្រី Rodriguez បាននិយាយថា រដ្ឋាភិបាលរបស់ខ្លួន នឹងដោះស្រាយជម្លោះយូរអង្វែងជាមួយទីក្រុងវ៉ាស៊ីនតោន «ទល់មុខគ្នា» តាមរយៈអ្វីដែលលោកស្រីពិពណ៌នាថា ជាគោលនយោបាយការបរទេសរបស់ទីក្រុងការ៉ាកាស។

លោកស្រី Rodriguez បាននិយាយថា៖«យើងមិនខ្លាចទេ ពីព្រោះអ្វីដែលត្រូវតែធ្វើឲ្យយើងរួបរួមគ្នា ជាប្រជាជនមួយ គឺការធានាសន្តិភាព និងស្ថិរភាពសម្រាប់ប្រទេសនេះ»។

លោកស្រីបានលើកឡើងថា ប្រទេសវ៉េណេស៊ុយអេឡា មិនដែលស្រមៃថា រដ្ឋធានីអាមេរិកខាងត្បូងមួយនេះ នឹងត្រូវទទួលរងការវាយប្រហារយោធាដោយមហាអំណាចបរទេសទេ ដោយសំដៅទៅលើព្រឹត្តិការណ៍នៅថ្ងៃទី ០៣ ខែមករា នៅពេលដែលកងកម្លាំងអាមេរិក បានវាយប្រហារទីក្រុងការ៉ាកាស និងចាប់ខ្លួនលោកប្រធានាធិបតី នីកូឡា ម៉ាឌូរ៉ូ ( Nicolas Maduro) និងភរិយារបស់លោក។

លោកស្រី Rodriguez បានអំពាវនាវឲ្យមានឯកភាពជាតិ និងជំរុញឲ្យប្រជាជនវ៉េណេស៊ុយអេឡាដោះស្រាយជម្លោះផ្ទៃក្នុងតាមរយៈការសន្ទនានយោបាយក្នុងស្រុក ដោយគ្មានការជ្រៀតជ្រែកពីបរទេស៕