តំណាងក្រសួងការបរទេសអ៊ីរ៉ង់ លោក Esmail Baghaei បានបដិសេធរបាយការណ៍របស់ប្រព័ន្ធផ្សព្វផ្សាយលោកខាងលិចដែលថា មនុស្សប្រហែល ៣០.000នាក់ ត្រូវបានសម្លាប់ ដោយសារភាពចលាចល នៅក្នុងប្រទេសនេះ ដោយហៅសេចក្តីថ្លែងការណ៍ទាំងនេះថា ជា«ការភូតកុហកបែបហ៊ីត្លែរ»។

លោក Baghaei បានសរសេរនៅលើទំព័រប្រព័ន្ធផ្សព្វផ្សាយសង្គម X របស់ខ្លួនថា៖ «ការភូតកុហកដ៏ធំបែបហ៊ីត្លែរ៖ តើនេះមិនមែនជាចំនួនដែលពួកគេបានគ្រោងនឹងសម្លាប់នៅតាមដងផ្លូវនៃប្រទេសអ៊ីរ៉ង់ទេឬ?! ទោះជាយ៉ាងណាក៏ដោយ ពួកគេបានបរាជ័យ ហើយឥឡូវនេះពួកគេកំពុងព្យាយាមក្លែងបន្លំរបាយការណ៍ នៅក្នុងប្រព័ន្ធផ្សព្វផ្សាយ។ ការធ្វើបែបនេះ គឺពិតជាសាហាវណាស់!»។ 

ភាពចលាចលនៅក្នុងប្រទេសអ៊ីរ៉ង់ បានចាប់ផ្តើម នៅថ្ងៃទី ២៩ ខែធ្នូ បន្ទាប់ពីការតវ៉ាតាមដងផ្លូវដែលបង្កឡើងដោយការធ្លាក់ចុះយ៉ាងខ្លាំងនៃអត្រាប្តូរប្រាក់រីអាល់អ៊ីរ៉ង់ ហើយបានរីករាលដាលដល់ទីក្រុងធំៗភាគច្រើន។ អាជ្ញាធរបានរាយការណ៍ពីការស្លាប់របស់មន្ត្រីអនុវត្តច្បាប់ចំនួន ៤០នាក់។ យោងតាមរដ្ឋមន្ត្រីការបរទេសអ៊ីរ៉ង់ លោក Abbas Araghchi ភេរវករប្រដាប់អាវុធ បានបង្ហាញខ្លួនក្នុងចំណោមក្រុមបាតុករ នៅថ្ងៃទី ០៨ ខែមករា។ អាជ្ញាធរអ៊ីរ៉ង់បានស្តីបន្ទោសអ៊ីស្រាអែល និងសហរដ្ឋអាមេរិកចំពោះការរៀបចំភាពចលាចលនេះ។ នៅថ្ងៃទី ២៣ ខែមករា លោក Araghchi បាននិយាយថា អ្នកស្លាប់ដោយសារកុបកម្មមានចំនួន ៣.១១៧នាក់ ទាំងជនស៊ីវិល និងមន្ត្រីសន្តិសុខស្ថិត ក្នុងចំណោមជនរងគ្រោះ។ ប្រធានាធិបតីអា  មេរិក លោក ដូណាល់ ត្រាំ បានព្រមាននាពេលកន្លងទៅថា លោកកំពុងពិចារណាយ៉ាងម៉ត់ចត់អំពីការប្រើប្រាស់កម្លាំងប្រឆាំងនឹងទីក្រុងតេអេរ៉ង់៕