ក្រុមសិទ្ធិមនុស្សដែលមានមូលដ្ឋាន នៅសហរដ្ឋអាមេរិក នាថ្ងៃចន្ទ (ទី២៦ ខែមករា) នេះ បានឲ្យដឹងថា ខ្លួន បានបញ្ជាក់ពីការស្លាប់របស់មនុស្ស ៥.៨៤៨នាក់ នៅក្នុងការតវ៉ាជាបន្តបន្ទាប់នៅក្នុងប្រទេសអ៊ីរ៉ង់ ដែលត្រូវបានបង្ក្រាបដោយកងកម្លាំងសន្តិសុខ ដោយបានព្រមានថា ខ្លួននៅតែកំពុងស៊ើបអង្កេតការស្លាប់ដែលអាចកើតមានរាប់ពាន់នាក់ទៀត។

គួរបញ្ជាក់ថា ការតវ៉ាបានចាប់ផ្តើមកាលពីចុងខែធ្នូឆ្នាំមុន ដែលបង្កឡើងដោយការមិនពេញចិត្ត ចំពោះសេដ្ឋកិច្ច ប៉ុន្តែបានប្រែក្លាយទៅជាចលនាដ៏ធំ ប្រឆាំងនឹងសាធារណរដ្ឋឥស្លាម ដោយមានការជួបជុំគ្នា តាមដងផ្លូវដ៏ធំអស់រយៈពេលជាច្រើនថ្ងៃ ចាប់តាំងពីថ្ងៃទី៨ ខែមករា។ ក្រុមសិទ្ធិមនុស្ស បានចោទប្រកាន់អាជ្ញាធរថា បានធ្វើការបង្ក្រាបមិនធ្លាប់មានពីមុន ដោយបានបាញ់ប្រហារដោយផ្ទាល់ទៅលើក្រុមបាតុករ ហើយមហាបាតុកម្មបានស្ងប់ស្ងាត់ទៅវិញហើយ សម្រាប់ពេលនេះ។

អង្គការមិនមែនរដ្ឋាភិបាលដែលតាមដានចំនួនអ្នកស្លាប់ បានលើកឡើងថា ភារកិច្ចរបស់ពួកគេត្រូវបានរារាំងដោយការបិទប្រព័ន្ធអ៊ីនធឺណិតរយៈពេល ១៨ថ្ងៃ ដោយព្រមានថា តួលេខដែលត្រូវបានបញ្ជាក់ ទំនងជាទាបជាងចំនួនអ្នកស្លាប់ជាក់ស្តែង។

ទីភ្នាក់ងារសារព័ត៌មានសកម្មជនសិទ្ធិមនុស្ស (HRANA) ដែលមានមូលដ្ឋាន នៅសហរដ្ឋអាមេរិក បានឲ្យដឹងថា ខ្លួនបានបញ្ជាក់ថា មនុស្សចំនួន ៥.៨៤៨នាក់ ត្រូវបានសម្លាប់ ដែលរួមមានអ្នកតវ៉ា ៥.៥២០នាក់ អនីតិជន ៧៧នាក់ សមាជិកកងកម្លាំងសន្តិសុខ ២០៩នាក់ និងអ្នកឈរមើល ៤២នាក់។

ប៉ុន្តែក្រុមនេះបានបន្ថែមថា ខ្លួននៅតែកំពុងស៊ើបអង្កេតករណីបាត់បង់ជីវីត ដែលអាចមាន ១៧.០៩១នាក់ផ្សេងទៀត។ ស្ថាប័ននេះបានបន្ថែមថា យ៉ាងហោចណាស់មនុស្ស ៤១.២៨៣នាក់ត្រូវបានចាប់ខ្លួន៕