កាលពីថ្ងៃអាទិត្យ ប្រធានាធិបតីសហរដ្ឋអាមេរិកលោក Donald Trump បាននិយាយការពារដល់ការបង្រ្កាបអន្តោប្រវេសន៍ដ៏ឃោឃៅរបស់រដ្ឋបាលលោក ក្រោយករណីបាញ់សម្លាប់មនុស្សលើកទី ២ដោយភ្នាក់ងារសហព័ន្ធ នៅទីក្រុង Minneapolis ។

គួរឲ្យដឹងថា ភ្នាក់ងារអន្តោប្រវេសន៍សហព័ន្ធ និងក្រុមបាតុករ បានប៉ះទង្គិចគ្នានៅតាមដងផ្លូវនៅក្នុងទីក្រុង Minneapolis កាលពីថ្ងៃសៅរ៍ ក្រោយភ្នាក់ងារមួយនេះ បាញ់សម្លាប់មនុស្សម្នាក់ ជាលើកទី ២ នៅក្នុងទីក្រុងមួយនេះ អំឡុងពេល ១ខែ ។ 

រូបភាពវីដេអូឃ្លីបទទួលបាន និងផ្ទៀងផ្ទាត់ដោយទីភ្នាក់ងារព័ត៌មានរ៉យទ័រឃើញ ភ្នាក់ងារល្បាតព្រំដែនជាច្រើនរូប បានប្រតាយប្រតប់ជាមួយបុរសម្នាក់ មុនពេលបាញ់សម្លាប់គាត់ ។ សារព័ត៌មានក្នុងស្រុក បានកំណត់អត្តសញ្ញាណបុរសដែលត្រូវបានបាញ់សម្លាប់ម្នាក់នោះថាមានឈ្មោះ Alex Pretti អាយុ ៣៧ឆ្នាំ ។ 

ក្រសួងសន្តិសុខមាតុភូមិសហរដ្ឋអាមេរិកនិយាយថា ភ្នាក់ងារល្បាតព្រំដែន បាញ់ដើម្បីការពារខ្លួនប៉ុណ្ណោះ ក្រោយពួកគេព្យាយាមដណ្តើមអាវុធពីបុរសម្នាក់ដែលជាពលរដ្ឋសហរដ្ឋអាមេរិក ។

នៅលើបណ្តាញព័ត៌មានសង្គម Truth Social បង្ហោះកាលពីថ្ងៃអាទិត្យ លោក Trump ពុំបានបង្ហាញសញ្ញានៃការដកថយនោះទេ ហើយលោកនិយាយថា ប្រតិបត្តិការនេះ ស្ថិតនៅកណ្តាលនៃជ័យជំនះប្រធានាធិបតីឆ្នាំ ២០២៤របស់លោក ហើយការគ្របគ្រងសភារបស់គណបក្សសាធារណៈរដ្ឋ ។

លោកបន្តថា ពលរដ្ឋអាមេរិក ២នាក់ បានបាត់បង់អាយុជីវិតរបស់ពួកគេ ដោយសារក្រុមប្រជាធិបតេយ្យជាអ្នកបង្កភាពវឹកវរនេះ ។

សូមបញ្ជាក់ថា រដ្ឋបាលរបស់លោក Trumpបានចុះប្រតិបត្តិការអន្តោប្រវេសន៍ដ៏មានមហិច្ឆិតាបំផុតមកទល់នឹងពេលនេះ នៅទីក្រុង Minneapolis បង្កឲ្យមានបាតុកម្មរយៈពេលច្រើនសប្តាហ៍របស់អ្នកស្រុក និងការប៉ះទង្គិចគ្នាដោយហិង្សាជាមួយភ្នាក់ងារសហព័ន្ធ រួមទាំងករណីបាញ់សម្លាប់មនុស្ស ២នាក់ គឺលោក Renee Good កាលពីថ្ងៃទី ៧ ខែមករា និងលោក Alex Pretti កាលពីចុងសប្តាហ៍នេះ ៕