មន្ត្រីអាមេរិកម្នាក់បាននិយាយថា ការរំសាយអាវុធរបស់ក្រុមហាម៉ាសនៅតំបន់ហ្កាហ្សា នឹងត្រូវបានភ្ជាប់ជាមួយ «ការលើកលែងទោសមួយចំនួន» សម្រាប់ក្រុមប៉ាឡេស្ទីន។ មន្ត្រីអាមេរិក ដែលបាននិយាយទៅកាន់អ្នកសារព័ត៌មានក្នុងលក្ខខណ្ឌមិនបញ្ចេញឈ្មោះកាលពីថ្ងៃចន្ទ បានធ្វើអត្ថាធិប្បាយបន្ទាប់ពីសាកសពរបស់ជនជាតិអ៊ីស្រាអែលចុងក្រោយដែលត្រូវបានចាប់ជាចំណាប់ថ្នូរនៅក្នុងតំបន់ហ្កាហ្សាត្រូវបានរកឃើញ ជាចំណាត់ការមួយដែលបានត្រួសត្រាយផ្លូវឆ្ពោះទៅរកដំណាក់កាលបន្ទាប់នៃកិច្ចព្រមព្រៀងបទឈប់បាញ់នៅតំបន់ហ្កាហ្សា ដែលបានព្រមព្រៀងកាលពីខែតុលា។

មន្ត្រីនិយាយថា «យើងកំពុងស្តាប់មនុស្សជាច្រើននិយាយអំពីការរំសាយអាវុធ។ យើងគិតថាពួកគេនឹងធ្វើ។ ប្រសិនបើពួកគេមិនរំសាយអាវុធទេ នោះពួកគេរំលោភលើកិច្ចព្រមព្រៀង។ យើងគិតថាការរំសាយអាវុធភ្ជាប់ជាមួយនឹងការលើកលែងទោសមួយចំនួននិងដោយស្មោះត្រង់ ដែលយើងគិតថាយើងមានកម្មវិធីដ៏ល្អដើម្បីរំសាយអាវុធ» នេះបើយោងតាមទីភ្នាក់ងារសារព័ត៌មានរ៉យទ័រ។

អ្នកស្រី Rosiland Jordan មកពីសារព័ត៌មាន Al Jazeera រាយការណ៍ពីទីក្រុងវ៉ាស៊ីនតោនឌីស៊ី បាននិយាយថា មន្ត្រីរូបនេះបានធ្វើអត្ថាធិប្បាយក្នុងអំឡុងពេលសន្និសីទរបស់មន្ត្រីជាន់ខ្ពស់មកពីរដ្ឋបាលរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ និងអ្នកសារព័ត៌មាន។ អ្នកស្រី Jordan និយាយថា «មន្ត្រីរដ្ឋបាលជាន់ខ្ពស់បានប្រាប់អ្នកសារព័ត៌មានថា ក្រុមហាម៉ាសបានព្រមព្រៀងរំសាយអាវុធ ហើយវានឹងកើតឡើង»។ «មន្ត្រីដដែលនេះក៏បាននិយាយសំដៅទៅលើការពិតផងដែរ នៅពេលដែលសំណួរត្រូវបានលើកឡើងអំពីថាតើក្រុមហាម៉ាសអាចត្រូវបានទទួលស្គាល់ថាជាអង្គភាពនយោបាយជាថ្នូរទៅនឹងការរំសាយអាវុធដែរឬទេ នោះមន្ត្រីរូបនេះបាននិយាយថាលទ្ធភាពនៃការលើកលែងទោសសម្រាប់អ្នកប្រយុទ្ធក្រុមហាម៉ាសទាំងនោះដែលទម្លាក់អាវុធរបស់ពួកគេចុះ គឺជាផ្នែកមួយនៃកិច្ចពិភាក្សា»។