អត្តពលកម្ម៖ លោក Valson Cuddinkotta ប្រធានបច្ចេកទេសរៀបចំការប្រកួតនៃសហព័ន្ធអត្តពលកម្មអាស៊ី បានធ្វើការកោតសរសើរ និងវាយតម្លៃខ្ពស់ ចំពោះធនធានមន្ដ្រីបច្ចេកទេសកីឡាអត្តពលកម្មកម្ពុជា ដែលសម្បូរដោយអ្នកមានសមត្ថភាព និងយល់ដឹងច្រើនអំពីរបៀបរបបដឹកនាំ និងរៀបចំការប្រកួតទាំងថ្នាក់ជាតិ និងអន្ដរជាតិ។
អ្នកជំនាញអន្ដរជាតិរូបនេះបានសម្ដែងការភ្ញាក់ផ្អើល បន្ទាប់ពីលោកបានចូលរួមជាគ្រូឧទ្ទេសក្នុងវគ្គបណ្ដុះបណ្ដាល មន្ដ្រីបច្ចេកទេសកីឡាអត្តពលកម្មអន្ដរជាតិកម្រិត១ រៀបចំដោយសហព័ន្ធខ្មែរអត្តពលកម្មស្ម័គ្រចិត្តចំនួន ២វគ្គដែលបញ្ចប់ការពីចុងសប្ដាហ៍កន្លងទៅនៅពហុកីឡដ្ឋានជាតិមរតកតេជោ។ លោក Valson Cuddinkotta បានអបអរសាទរសហព័ន្ធអត្តពលកម្មកម្ពុជា ដែលសម្បូរធនធានមន្ដ្រីបច្ចេកទេសប្រកបដោយសក្ដានុពល។ លោករំពឹងថា វគ្គនេះនឹងជំរុញឲ្យមន្ដ្រីបច្ចេកទេសកីឡាអត្តពលកម្មកម្ពុជាកាន់តែមានសមត្ថភាព ដើម្បីត្រៀមរៀបចំកការប្រកួតអន្ដរជាតិនានា ពិសេសស៊ីហ្គេមឆ្នាំ២០២៣ ហើយលោកសន្យានឹងពាំនាំនូវការអភិវឌ្ឍនេះ រាយការណ៍ជូនសហព័ន្ធអត្តពលកម្មអាស៊ី និងសហព័ន្ធអត្តពលកម្មអន្ដរជាតិទៀតផង។
ទន្ទឹមជាមួយគ្នា ឯកឧត្តម សំហេង បុរស ប្រធានសហព័ន្ធខ្មែរអត្តពលកម្មស្ម័គ្រចិត្ត បានសម្ដែងការសប្បាយចិត្តចំពោះវគ្គបណ្ដុះបណ្ដាលដ៏មានសារៈសំខាន់នេះ ស្របពេលសហព័ន្ធកំពុងមានត្រូវការច្រើន ដើម្បីសម្រួចការអភិវឌ្ឍត្រៀមស៊ីហ្គេមពិសេសមន្ដ្រីបច្ចេកទេស ក៏ដូចជាអាជ្ញាកណ្ដាល-ចៅក្រមដើម្បីដឹកនាំ និងរៀបចំការប្រកួត។ គួរបញ្ជាក់ថា វគ្គបណ្ដុះបណ្ដាលអន្ដរជាតិកម្រិត១ នេះបានចែកចេញជា ២វគ្គដោយមានសិក្ខាកាម ៥០នាក់ចូលរួមក្នុងមួយវគ្គ ២៥នាក់ ដោយវគ្គទី១ សិក្សាពីថ្ងៃទី០១-០៥ ខែមីនា និងវគ្គទី២ សិក្សាពីថ្ងៃទី០៧-១១ ខែមីនា ឆ្នាំ២០២២។ ក្រោយចប់ការសិក្សាលោក Valson Cuddinkotta បានវាយតម្លៃថា មានសិក្ខាកាមស្ទើរ ១០០% ដែលបានប្រឡងជាប់ ហើយមានសិក្ខាកាមមួយចំនួនអាចចូលរួម សិក្សាវគ្គមន្ដ្រីបច្ចេកទេសអន្ដរជាតិកម្រិត២ ផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
