ទីភ្នាក់ងារអន្តោប្រវេសន៍របស់អង្គការសហប្រជាជាតិ បាននិយាយកាលពីថ្ងៃចន្ទថា ប្រជាជនស៊ូដង់ជាងបីលាននាក់ ដែលបានភៀសខ្លួនដោយសារសង្គ្រាមជិតបីឆ្នាំ បានវិលត្រឡប់មកផ្ទះសម្បែងវិញ ទោះបីជាការប្រយុទ្ធគ្នាយ៉ាងខ្លាំង នៅតែបន្តរាលដាលដល់តំបន់នានានៃប្រទេសនេះក៏ដោយ។

ចាប់តាំងពីខែមេសា ឆ្នាំ ២០២៣ ប្រទេសស៊ូដង់ ត្រូវបានជាប់គាំងនៅក្នុងសង្គ្រាមដ៏សាហាវមួយ ដែលធ្វើឲ្យកងទ័ពធម្មតាប្រឆាំងនឹងកងកម្លាំងគាំទ្ររហ័ស (RSF)។

ជម្លោះនេះបានសម្លាប់មនុស្សរាប់ម៉ឺននាក់ និងបានបង្កើតអ្វីដែល UN ពិពណ៌នាថា ជាវិបត្តិភៀសខ្លួន និងភាពអត់ឃ្លានដ៏ធំបំផុតរបស់ពិភពលោក។ នៅពេលឈានដល់កម្រិតកំពូលនោះ សង្គ្រាមនេះ បានធ្វើឲ្យមនុស្សប្រហែល ១៤ លាននាក់ បានភៀសខ្លួនទាំងក្នុងស្រុក និងឆ្លងកាត់ព្រំដែន។

នៅក្នុងរបាយការណ៍មួយដែលចេញផ្សាយកាលពីថ្ងៃចន្ទ អង្គការទេសន្តរប្រវេសន៍អន្តរជាតិ (IOM) បាននិយាយថា ជនជាតិស៊ូដង់ដែលភៀសខ្លួនប្រមាណ ៣,៣ លាននាក់ បានធ្វើដំណើរត្រឡប់ទៅផ្ទះសម្បែងវិញ នៅខែវិច្ឆិកា ឆ្នាំមុន។

ការកើនឡើងនៃការវិលត្រឡប់នេះ បានកើតឡើង បន្ទាប់ពីការវាយលុកដ៏ខ្លាំងក្លាមួយដែលបានធ្វើឡើងដោយកងទ័ពស៊ូដង់ នៅចុងឆ្នាំ ២០២៤ ដើម្បីដណ្តើមយកតំបន់ភាគកណ្តាលដែល RSF បានគ្រប់គ្រង នៅពេលជម្លោះ បានចាប់ផ្តើមដំបូង។

យុទ្ធនាការនេះ បានឈានដល់កម្រិតខ្ពស់បំផុត នៅក្នុងការដណ្តើមយកទីក្រុងខាទុំ( Khartoum) មកវិញនៅក្នុងខែមីនា ឆ្នាំ ២០២៥ ដែលជំរុញឲ្យប្រជាជនជាច្រើនគ្រួសារ ដែលត្រូវបានផ្លាស់ទីលំនៅ ព្យាយាមត្រឡប់ទៅផ្ទះសម្បែងវិញ៕