លោក Tom Barrack ឯកអគ្គរដ្ឋទូតអាមេរិកប្រចាំប្រទេសទួរគី និងជាបេសកជនពិសេសសម្រាប់ប្រទេសស៊ីរី កាលពីថ្ងៃចន្ទ បានបញ្ជាក់ជាថ្មីនូវបំណងប្រាថ្នារបស់ទីក្រុងវ៉ាស៊ីនតោន ដើម្បីធានាកិច្ចព្រមព្រៀងឈប់បាញ់ នៅភាគឦសានប្រទេសស៊ីរី រវាងរដ្ឋាភិបាលស៊ីរី និងកងកម្លាំងប្រជាធិបតេយ្យស៊ីរី (SDF) នៅតែបន្ត។

នៅក្នុងសារមួយដែលបានបង្ហោះនៅលើវេទិកាប្រព័ន្ធផ្សព្វផ្សាយសង្គម X លោកបានសរសេរថា៖ «ការហៅទូរស័ព្ទដ៏មានផលិតភាព នៅល្ងាចនេះ ជាមួយឯកឧត្តម Masoud Barzani ដើម្បីពិភាក្សាអំពីស្ថានភាព នៅក្នុងប្រទេសស៊ីរី និងសារៈសំខាន់នៃការបន្តបទឈប់បាញ់ និងធានាជំនួយមនុស្សធម៌ ដល់អ្នកដែលកំពុងត្រូវការ ជាពិសេសនៅក្នុងទីក្រុង Kobani»។

លោក Barzani គឺជាមេដឹកនាំគណបក្សប្រជាធិបតេយ្យឃើដ តាំងពីឆ្នាំ ១៩៧៩ ហើយបានបម្រើការជាប្រធានតំបន់ឃើដ នៅចន្លោះ ឆ្នាំ ២០០៥ និង ២០១៧។

នាពេលកន្លងទៅ លោក Nechirvan Barzani បានស្វាគមន៍ចំពោះក្រឹត្យថ្មីៗនេះរបស់ប្រធានាធិបតីស៊ីរី លោក Ahmad Al-Sharaa ដែលទទួលស្គាល់ជាផ្លូវការនូវប្រជាជនឃើដ ជាផ្នែកសំខាន់មួយរបស់ប្រទេសនេះ។

លោក Barrack បានបញ្ជាក់ជាថ្មីនូវការគាំទ្ររបស់ទីក្រុងវ៉ាស៊ីនតោនចំពោះកិច្ចខិតខំប្រឹងប្រែង ដើម្បីជំរុញកិច្ចព្រមព្រៀងថ្ងៃទី ១៨ ខែមករា រវាងរដ្ឋាភិបាលស៊ីរី និង SDF ដើម្បីរួមបញ្ចូល SDF ទៅក្នុង     ស្ថាប័នរដ្ឋ។ SDF គឺជាក្រុមមួយដឹកនាំដោយជនជាតិឃើដ ដែលដឹកនាំដោយលោក Mazloum Abdi ដែលធ្វើប្រតិបត្តិការនៅភាគឦសាននៃប្រទេសស៊ីរី ហើយនៅពេលថ្មីៗនេះ បានប៉ះទង្គិចជាមួយកងកម្លាំងរដ្ឋាភិ  បាល។

កាលពីថ្ងៃសៅរ៍ (ទី ២៤ ខែមករា) ទីភ្នាក់ងារសារព័ត៌មានអារ៉ាប់ស៊ីរី បានរាយការណ៍ថា ក្រសួងការពារជាតិស៊ីរី បានប្រកាសពីការបន្តកិច្ចព្រមព្រៀងឈប់បាញ់រយៈពេល ១៥ថ្ងៃ៕