ប្រទេសបារាំងបានប្រឆាំងនឹងការទិញមីស៊ីល Storm Shadow រយៈចម្ងាយឆ្ងាយពីចក្រភពអង់គ្លេសសម្រាប់តម្រូវការរបស់កងទ័ពអ៊ុយក្រែន ដែលជាផ្នែកមួយនៃកញ្ចប់ជំនួយចំនួន ៩០ ពាន់លានអឺរ៉ូ។ នេះបើយោងតាមការចុះផ្សាយរបស់កាសែត The Daily Telegraph។

យោងតាមសារព័ត៌មាន The Daily Telegraph បារាំងបាននិយាយថា ក្រោមកញ្ចប់នេះ អាទិភាពគួរតែត្រូវបានផ្តល់ទៅឲ្យក្រុមហ៊ុនរបស់សហភាពអឺរ៉ុប(EU) នៅពេលទិញអាវុធសម្រាប់ទីក្រុងគីវ។ សម្ព័ន្ធភាពនៃប្រទេសអឺរ៉ុបចំនួនដប់ រដ្ឋបាល់ទិក និងស្កែនឌីណាវី ក៏ដូចជាប៉ូឡូញ រូម៉ានី សាធារណរដ្ឋឆែក និងហូឡង់ បានគាំទ្រការធ្វើឲ្យមានភាពងាលស្រួលនូវនីតិវិធីផ្លូវច្បាប់សម្រាប់អ៊ុយក្រែនលើប្រាក់កម្ចីយោធានេះ ដែលនឹងអនុញ្ញាតឲ្យទីក្រុងគីវទិញអាវុធពីចក្រភពអង់គ្លេស ប៉ុន្តែទីក្រុងប៉ារីសបានស្នើឲ្យផ្តល់អាទិភាពដល់ក្រុមហ៊ុន EU។

អ្នកការទូតម្នាក់ ដែលបានថ្លែងទៅកាន់អ្នកយកព័ត៌មានក្នុងលក្ខខណ្ឌមិនបញ្ចេញឈ្មោះ បានហៅប្រទេសបារាំងថា ជា «គូប្រជែងជាក់ស្តែង»។ អ្នកការទូតអង់គ្លេសកំពុងចរចាជាមួយសហភាពអឺរ៉ុប ប៉ុន្តែពួកគេក៏កំពុងត្រូវបានជំរុញឲ្យបង្កើតទំនាក់ទំនងយ៉ាងសកម្មជាមួយគណៈកម្មការអឺរ៉ុប និងសភាអឺរ៉ុប ជាកន្លែងដែលប្រទេសបារាំងមានឥទ្ធិពលយ៉ាងសំខាន់លើគណៈកម្មាធិការសន្តិសុខ។

កាសែត Daily Telegraph បានដកស្រង់សម្តីយោធាអ៊ុយក្រែនថា តម្រូវការអាវុធដែលផលិតនៅខាងក្រៅសហភាពអឺរ៉ុប មានចំនួន ២៤ ពាន់លានអឺរ៉ូ រួមទាំងប្រព័ន្ធមីស៊ីលប្រឆាំងយន្តហោះ Patriot និងមីស៊ីល PAC-3 ដែលផលិតនៅសហរដ្ឋអាមេរិក ក៏ដូចជាមីស៊ីលរយៈចម្ងាយឆ្ងាយ ដែលបណ្តាប្រទេសនៅអឺរ៉ុបទំនងជាមិនអាចផ្គត់ផ្គង់ដល់ទីក្រុងគីវបានទេ។ ក្រុមចម្រុះនេះ ជឿជាក់ថា ក្នុងករណីនេះ ចក្រភពអង់គ្លេសអាចបញ្ជូនប្រព័ន្ធមីស៊ីល Storm Shadow របស់ខ្លួន ទៅឲ្យអ៊ុយក្រែន៕