កងកម្លាំងប្រដាប់អាវុធទីក្រុងម៉ានីល បាននិយាយនៅថ្ងៃអង្គារ (២៧ មករា) នេះថា យោធាហ្វីលីពីន និងសហរដ្ឋអាមេរិក បានធ្វើសមយុទ្ធរួមគ្នាក្នុងសប្តាហ៍នេះ នៅតំបន់ថ្មប៉ប្រះទឹកសមុទ្រចិនខាងត្បូងដែលមានជម្លោះ ដើម្បីជំរុញអន្តរប្រតិបត្តិការរវាងសម្ព័ន្ធមិត្តសន្ធិសញ្ញាទាំងពីរ ខណៈយោធាចិន រិះគន់ «ការល្បាតរួមគ្នា» នេះថារំខានដល់សន្តិភាព និងស្ថិរភាពនៅសមុទ្រចិនខាងត្បូង។

សមយុទ្ធរួមគ្នានេះត្រូវបានធ្វើឡើងនៅតំបន់ថ្មប៉ប្រះទឹក Scarborough ក្នុងដែនទឹកសមុទ្រចិនខាងត្បូង ដែលស្ថិតនៅតំបន់សេដ្ឋកិច្ចផ្តាច់មុខរបស់ហ្វីលីពីន ខណៈតំបន់នោះក៏ត្រូវបានចិន អះអាងសិទ្ធិថាជាផ្នែកមួយនៃទឹកដីរបស់ខ្លួនផងដែរ។ នេះគឺជា «សកម្មភាពសហប្រតិបត្តិការផ្លូវសមុទ្រ» លើកទី ១១ ហើយ ដែលពាក់ព័ន្ធនឹងសហរដ្ឋអាមេរិក និងហ្វីលីពីន ចាប់តាំងពីខែវិច្ឆិកា ឆ្នាំ២០២៣ មក។

កងកម្លាំងប្រដាប់អាវុធហ្វីលីពីន បាននិយាយក្នុងសេចក្តីថ្លែងការណ៍មួយថា «ការអនុវត្តសកម្មភាពទាំងនេះដោយជោគជ័យ បានបង្កើនការសម្របសម្រួល ជំនាញយុទ្ធសាស្ត្រ និងការយោគយល់គ្នាទៅវិញទៅមករវាងកងកម្លាំងសម្ព័ន្ធមិត្ត»។

នៅថ្ងៃអង្គារដដែលនេះ បញ្ជាការដ្ឋានភាគខាងត្បូងនៃយោធាចិន បាននិយាយថា ខ្លួនក៏បានធ្វើការល្បាតជាប្រចាំនៅសមុទ្រចិនខាងត្បូងផងដែរ ដោយបន្ថែមនៅក្នុងសេចក្តីថ្លែងការណ៍មួយថា៖ ហ្វីលីពីន បានសហការជាមួយប្រទេសនៅខាងក្រៅតំបន់ ដើម្បីរៀបចំនូវអ្វីដែលហៅថា «ការល្បាតរួមគ្នា» ដែលរំខានដល់សន្តិភាព និងស្ថិរភាពនៅសមុទ្រចិនខាងត្បូង ហើយចិន នឹងការពារយ៉ាងម៉ឺងម៉ាត់នូវអធិបតេយ្យភាពទឹកដីជាតិ សិទ្ធិ និងផលប្រយោជន៍ដែនសមុទ្រ ព្រមទាំងរក្សាយ៉ាងរឹងមាំនូវសន្តិភាព និងស្ថិរភាពក្នុងតំបន់៕