ប្រធានតុលាការអ៊ីរ៉ង់បានព្រមានថា អ្នកដែលនៅពីក្រោយរលកនៃការតវ៉ាប្រឆាំងរដ្ឋាភិបាលថ្មីៗនេះ អាចរំពឹងថា នឹងត្រូវរងការដាក់ទណ្ឌកម្ម «ដោយគ្មានការលើកលែងទោសបន្តិចបន្តួចឡើយ»។

អ្វីដែលបានចាប់ផ្តើមនៅដើមខែនេះ ខណៈដែលបាតុកម្មប្រឆាំងនឹងការចំណាយខ្ពស់សម្រាប់ការរស់នៅ បានធ្វើឲ្យស្ថានភានតានតឹងក្លាយជាចលនាតវ៉ាកាន់តែទូលំទូលាយ ដែលជាបញ្ហាប្រឈមដ៏ធ្ងន់ធ្ងរបំផុតចំពោះថ្នាក់ដឹកនាំ ក្នុងរយៈពេលជាច្រើនឆ្នាំ។

ការតវ៉ាបានថយចុះក្រោមការដាច់ចរន្តអ៊ីនធឺណិត ដែលធ្វើឲ្យប្រទេសនេះភាគច្រើន ត្រូវបានកាត់ផ្តាច់ចេញពីពិភពខាងក្រៅ។

លោក Gholamhossein Mohseni Ejei ប្រធានតុលាការត្រូវបានដកស្រង់សម្តីដោយគេហទំព័រព័ត៌មានអនឡាញផ្លូវការ Mizan ថា៖«ប្រជាជនទាមទារយ៉ាងត្រឹមត្រូវថា ជនជាប់ចោទ និងអ្នកញុះញង់សំខាន់ៗនៃកុបកម្ម និងអំពើភេរវកម្ម និងអំពើហិង្សា ត្រូវបានកាត់ទោសឲ្យបានលឿន តាមដែលអាចធ្វើទៅបាន និងផ្តន្ទាទោស ប្រសិនបើត្រូវបានរកឃើញថា មានទោសនោះ»។

លោកបានបន្តនិយាយថា៖«ភាពតឹងរ៉ឹងបំផុត ត្រូវតែត្រូវបានអនុវត្តនៅក្នុងការស៊ើបអង្កេត» ប៉ុន្តែបានទទូចថា «យុត្តិធម៌ពាក់ព័ន្ធនឹងការវិនិច្ឆ័យ និងដាក់ទណ្ឌកម្ម ដោយគ្មានការលើកលែងទោសបន្តិចបន្តួចចំពោះឧក្រិដ្ឋជនដែលបានកាន់អាវុធ និងសម្លាប់មនុស្ស ឬបានប្រព្រឹត្តការដុតផ្ទះសម្បែង ការបំផ្លិចបំផ្លាញ និងការសម្លាប់រង្គាល»៕