មនុស្សប្រហែល២.០០០នាក់ត្រូវស្នាក់នៅមួយយប់នៅអាកាសយានដ្ឋានមួយកន្លែងនៅកោះហុកកៃដូ ភាគខាងជើងប្រទេសជប៉ុន បន្ទាប់ពីព្រិលធ្លាក់ខ្លាំងបានធ្វើឲ្យរំខានដល់ការដឹកជញ្ជូនសាធារណៈ។ សេវារថភ្លើង និងរថយន្តក្រុងទៅនិងមកពីអាកាសយានដ្ឋាន New Chitose ជិតទីក្រុង Sapporo ត្រូវបានលុបចោលកាលពីថ្ងៃចន្ទ នៅពេលដែលព្រិលធ្លាក់ខ្លាំងបានវាយប្រហារទីក្រុងនេះ និងតំបន់ជុំវិញនោះ។

មានការពន្យារពេលយូរ សូម្បីតែក្រោយពីប្រតិបត្តិការរថភ្លើងបានបន្តឡើងវិញនៅពេល១ថ្ងៃក្រោយមក ដោយទីតាំងនានានៅជុំវិញជណ្តើរយន្តចូលទៅក្នុងអាកាសយានដ្ឋានមានមនុស្សច្រើនកុះករ។ អ្នកធ្វើដំណើរដែលស្នាក់នៅមួយយប់នៅអាកាសយានដ្ឋានបានដេកលើកម្រាល ឬពូកខ្យល់ដែលត្រូវបានផ្តល់ឲ្យ។

ប្រតិបត្តិករអាកាសយានដ្ឋានបាននិយាយថា មនុស្សប្រហែល២.០០០នាក់នៅតែជាប់គាំងនៅទីនោះរហូតដល់ព្រឹកថ្ងៃអង្គារនេះ។ វាជាថ្ងៃទីពីរជាប់ៗគ្នាដែលមនុស្សរាប់ពាន់នាក់បានជាប់គាំងខ្លួន។

បុរសម្នាក់ស្ថិតក្នុងវ័យ៤០ឆ្នាំបាននិយាយថា លោកកំពុងធ្វើដំណើរអាជីវកម្មពីខេត្ត Shizuoka នៅ ប្រទេសជប៉ុនភាគកណ្តាលដោយលោកបានទៅដល់នៅពេលយប់ ហើយរង់ចាំរថភ្លើងប្រហែលបីម៉ោង។ បុរសរូបនេះបាននិយាយថា លោកមិននឹកស្មានថាការរំខានដល់ការដឹកជញ្ជូននឹងបន្តរយៈពេលរហូតដល់ពីរថ្ងៃជាប់ៗគ្នានោះទេ។