លោកស្រីនាយករដ្ឋមន្ត្រី Sanae Takaichi បាននិយាយថា សម្ព័ន្ធភាពយុទ្ធសាស្ត្ររបស់ជប៉ុន ជាមួយសហរដ្ឋអាមេរិក នឹងដួលរលំ ប្រសិនបើទីក្រុងតូក្យូធ្វើមិនដឹងមិនឮ ចំពោះជម្លោះ នៅកោះតៃវ៉ាន់ ប៉ុន្តែបានព្យាយាមនៅឆ្ងាយពីការអត្ថាធិប្បាយពីមុន ដែលបានលើកឡើងពីលទ្ធភាពអាចមានការឆ្លើយតបខាងយោធា នៅក្នុងព្រឹត្តិការណ៍បែបនេះ។

លោកស្រី Takaichi បានសម្តែងនូវទស្សនៈចុងក្រោយបង្អស់របស់លោកស្រី តាមរយៈកម្មវិធីទូរទស្សន៍ដែលចាក់ផ្សាយទូទាំងប្រទេស កាលពីយប់ថ្ងៃចន្ទ (ទី២៦ ខែមករា ឆ្នាំ២០២៦) ជាកន្លែងដែលមេដឹកនាំគណបក្សប្រឆាំង បានរិះគន់លោកស្រីថា បានបញ្ឆេះឲ្យមានភាពតានតឹងជាមួយប្រទេសចិន ដោយការកត់សម្គាល់ពីមុន។

គួរបញ្ជាក់ថា ទំនាក់ទំនង រវាងជប៉ុន និងចិន បានធ្លាក់ដល់កម្រិតអាក្រក់បំផុតជាលើកដំបូង ក្នុងរយៈពេលជាច្រើនឆ្នាំ បន្ទាប់ពីលោកស្រី Takaichi បាននិយាយកាលពីខែវិច្ឆិកា ឆ្នាំ២០២៥ ថា ឧបមាថា ចិនវាយប្រហារកោះតៃវ៉ាន់នោះ ជប៉ុនអាចមានការឆ្លើយតបខាងយោធា។ ទីក្រុងប៉េកាំងបានតបតវិញ ដោយការទប់ស្កាត់ការនាំចេញ ការលុបចោលជើងហោះហើរ និងការអត្ថាធិប្បាយខ្លាំងពេញដោយកំហឹង ខណៈទាមទារម្តងហើយម្តងទៀតឲ្យដកសម្ដីនោះចេញ។ ចិនអះអាងសិទ្ធិអធិបតេយ្យ លើកោះតៃវ៉ាន់ដែលគ្រប់គ្រងដោយលទ្ធិប្រជាធិបតេយ្យ។

យ៉ាងណាក្ដី នៅក្នុងកម្មវិធីទូរទស្សន៍ផ្សាយផ្ទាល់ ដោយសំដៅទៅលើមតិយោបល់ដែលលោកស្រី បានធ្វើឡើងនៅសភា កាលពីខែវិច្ឆិកា ឆ្នាំ២០២៥ លោកស្រី Takaichi បានប្រាប់ថា៖ «ខ្ញុំចង់បញ្ជាក់ឲ្យបានច្បាស់លាស់ទាំងស្រុងថា នេះមិនមែនជាការនិយាយថា ជប៉ុនត្រូវតែចេញទៅចាត់វិធានការយោធានោះទេ ប្រសិនបើចិន និងសហរដ្ឋអាមេរិក មានជម្លោះ (ជុំវិញបញ្ហាកោះតៃវ៉ាន់)»។

លោកស្រីបានសង្កត់ធ្ងន់ថា៖ «ប្រសិនបើមានអ្វីធ្ងន់ធ្ងរកើតឡើងនៅទីនោះ យើងនឹងត្រូវទៅជួយសង្គ្រោះពលរដ្ឋជប៉ុន និងអាមេរិក នៅកោះតៃវ៉ាន់។ ក្នុងស្ថានភាពនោះ អាចនឹងមានករណីដែលយើងចាត់វិធានការរួមគ្នា។ ហើយប្រសិនបើកងកម្លាំងអាមេរិក ដែលធ្វើសកម្មភាពរួមជាមួយយើង ត្រូវបានវាយប្រហារ ហើយជប៉ុនមិនធ្វើអ្វីសោះ ហើយគ្រាន់តែគេចយករួចខ្លួននោះ សម្ព័ន្ធភាពជប៉ុន-អាមេរិក នឹងដួលរលំ»៕