លោកប្រធានាធិបតីសហរដ្ឋអាមេរិក Donald Trump បានប្រកាសអំឡុងពេលថ្លែងសុន្ទរកថានៅរដ្ឋ Iowa កាលពីថ្ងៃអង្គារ (២៧ មករា) ថា ក្រុមនាវាចម្បាំងដ៏ធំនៃយោធាសហរដ្ឋអាមេរិក មួយក្រុមបន្ថែមទៀត កំពុងធ្វើដំណើរឆ្ពោះទៅកាន់អ៊ីរ៉ង់ហើយ ហើយលោកសង្ឃឹមថា ទីក្រុងតេអេរ៉ង់ នឹងប្រញាប់ធ្វើកិច្ចព្រមព្រៀងជាមួយទីក្រុងវ៉ាស៊ីនតោន។

លោក Trump បានលើកឡើងដោយសំដៅដល់ប្រតិបត្តិការយោធាកាលពីពេលថ្មីៗនេះថា «កាលពីខែមិថុនា យោធាបានបំផ្លាញសមត្ថភាពនុយក្លេអ៊ែររបស់អ៊ីរ៉ង់ នៅក្នុងប្រតិបត្តិការ Midnight Hammer»។ លោកបានបង្ហើបពីមូលហេតុនៃប្រតិបត្តិការយោធាកាលពីឆ្នាំមុននោះថា៖ ពេលនោះ នៅសល់ប្រហែល ១ខែទៀតប៉ុណ្ណោះ អ៊ីរ៉ង់អាចមានអាវុធនុយក្លេអ៊ែរហើយ ដូច្នេះសហរដ្ឋអាមេរិក ត្រូវតែចាត់វិធានការ។

ទាក់ទងនឹងភាពតានតឹងបច្ចុប្បន្ន លោក Trump បានលើកឡើងថា៖ «មានកងនាវាចម្បាំងអាមេរិកដ៏ស្រស់ស្អាតមួយក្រុមធំទៀត កំពុងបណ្តែតខ្លួនឆ្ពោះទៅកាន់អ៊ីរ៉ង់ហើយនៅពេលនេះ» ដោយសម្ដែងក្ដីសង្ឃឹមរបស់លោកថា អ៊ីរ៉ង់នឹងប្រញាប់ «ធ្វើកិច្ចព្រមព្រៀង» ហើយពួកគេ «គួរតែធ្វើកិច្ចព្រមព្រៀងតាំងពីលើកដំបូងមកម្ល៉េះ»។ ការបញ្ជូនយុទ្ធោបករណ៍បន្ថែមទៀតនេះ បានកើតឡើងត្រឹមតែមួយសប្ដាហ៍ប៉ុណ្ណោះបន្តាប់ពីលោក Trump បានប្រាប់អ្នកយកព័ត៌មានលើយន្តហោះ Air Force One ក្នុងពេលត្រឡប់ពីកិច្ចប្រជុំនៅស្វីសថា សហរដ្ឋអាមេរិក កំពុងតាមដានអ៊ីរ៉ង់យ៉ាងដិតដល់ ហើយមាន «កងនាវាចម្បាំងដ៏ធំមួយក្រុមកំពុងឆ្ពោះទៅកាន់អ៊ីរ៉ង់ហើយ»។

បន្ថែមពីលើទ្រព្យសម្បត្តិយោធាដ៏ធំសម្បើម ប្រភពព័ត៌មានអាមេរិកបានបញ្ជាក់កាលពីថ្ងៃចន្ទថា ក្រុមប្រយុទ្ធនៃនាវាផ្ទុកយន្តហោះ USS Abraham Lincoln បានទៅដល់ដែនទឹកមជ្ឈិមបូព៌ារួចហើយ។ យោងតាមរបាយការណ៍សារព័ត៌មានកាលពីសប្ដាហ៍មុន ក្រុមប្រយុទ្ធនៃនាវាផ្ទុកយន្តហោះដ៏ធំនេះ រួមមាននាវាចម្បាំង នាវាពិឃាត និងយន្តហោះចម្បាំងរបស់សហរដ្ឋអាមេរិក ជាច្រើនគ្រឿងផ្សេងទៀត៕