ឧត្តមសេនីយ៍ចូលនិវត្តន៍មួយរូបរបស់អ៊ីស្រាអែល ដែលជាទីប្រឹក្សាយោធា បាននិយាយកាលពីថ្ងៃអង្គារ (២៧ មករា) ថា អ៊ីស្រាអែល បានឈូសឆាយដីនៅភាគខាងត្បូងតំបន់ហ្កាហ្សា សម្រាប់សាងសង់ជំរំដ៏ធំមួយសម្រាប់ដាក់ប្រជាជនប៉ាឡេស្ទីន ដែលអាចបំពាក់ដោយបច្ចេកវិទ្យាឃ្លាំមើល និងបច្ចេកវិទ្យាសម្គាល់មុខនៅច្រកចូលរបស់ជំរំ។

លោក Amir Avivi មេបញ្ជាការកងបម្រុងដែលចូលនិវត្តន៍ បានប្រាប់សារព័ត៌មានរ៉យទ័រនៅក្នុងបទសម្ភាសន៍មួយថា ជំរំនេះនឹងត្រូវសាងសង់ឡើងនៅក្នុងតំបន់ក្រុងរ៉ាហ្វា ហើយផ្លូវរូងក្រោមដីដែលសាងសង់ដោយក្រុមហាម៉ាសនៅទីនោះ ត្រូវបានបោសម្អាតរួចរាល់ហើយ ខណៈការចូល និងចេញពីក្នុងជំរំ នឹងត្រូវបានតាមដានដោយបុគ្គលិកអ៊ីស្រាអែល។

លោក Avivi បន្តថា ជំរំនេះនឹងត្រូវប្រើប្រាស់សម្រាប់ផ្តល់ទីជម្រកដល់ជនជាតិប៉ាឡេស្ទីន ដែលចង់ចាកចេញពីតំបន់ហ្កាហ្សា និងឆ្លងចូលទៅក្នុងប្រទេសអេហ្ស៊ីប ក៏ដូចជាអ្នកដែលចង់ស្នាក់នៅផងដែរ។ ការអត្ថាធិប្បាយរបស់អតីតមន្រ្តីជាន់ខ្ពស់រូបនេះបានកើតឡើង ខណៈដែលអ៊ីស្រាអែល កំពុងរៀបចំសម្រាប់ការ «បើកឡើងវិញមានកំណត់» នៃច្រកព្រំដែនរ៉ាហ្វា របស់តំបន់ហ្កាហ្សា ជាមួយអេហ្ស៊ីប ដែលជាតម្រូវការសំខាន់មួយក្រោមផែនការសន្តិភាពរបស់អាមេរិក ដើម្បីបញ្ចប់សង្គ្រាមហ្កាហ្សា។

ប្រភពបានប្រាប់សារព័ត៌មានរ៉យទ័រនៅខែមករានេះថា អ៊ីស្រាអែលចង់ធានាថា ជនជាតិប៉ាឡេស្ទីនចាកចេញពីតំបន់ហ្កាហ្សា គឺច្រើនជាងអ្នកដែលត្រូវបានអនុញ្ញាតឱ្យចូល។ ក្រុមមន្ត្រីអ៊ីស្រាអែល ធ្លាប់និយាយកាលពីមុនអំពីការលើកទឹកចិត្តប្រជាជនហ្កាហ្សា ឱ្យធ្វើចំណាកស្រុក ប៉ុន្តែពួកគេបដិសេធថា មិនមានបំណងជម្លៀសប្រជាជនចេញដោយប្រើកម្លាំងនោះទេ ដែលជាបញ្ហាដ៏រសើបខ្លាំងបំផុតសម្រាប់ប្រជាជនប៉ាឡេស្ទីន៕