ប្រធានាធិបតីប្រទេសកូឡុំប៊ី លោក Gustavo Petro បាននិយាយកាលពីថ្ងៃអង្គារ ទី២៧ ខែមករា ថា លោក Nicolas Maduro ប្រធានាធិបតីដែលត្រូវបានបណ្តេញចេញពីតំណែងរបស់ប្រទេសវ៉េណេស៊ុយអេឡា ត្រូវតែបញ្ជូនត្រឡប់ពីសហរដ្ឋអាមេរិកទៅកាន់ប្រទេសរបស់លោកវិញ ដើម្បីឲ្យតុលាការជម្រះក្តីនៅក្នុងប្រទេសផលិតប្រេងមួយនេះ។

លោក Maduro កំពុងត្រូវបានឃុំខ្លួននៅក្នុងពន្ធនាគារមួយក្នុងទីក្រុងញូវយ៉ក បន្ទាប់ពីកងកម្លាំងសហរដ្ឋអាមេរិកបានចាប់ខ្លួនលោកនៅទីក្រុង Caracas កាលពីដើមខែមករា ក្នុងប្រតិបត្តិការដែលបញ្ជាដោយលោក Donald Trump។

ការលើកឡើងរបស់លោក Petro ធ្វើឡើងមួយសប្តាហ៍មុនពេលធ្វើដំណើរទៅកាន់ទីក្រុងវ៉ាស៊ីនតោន ជាកន្លែងដែលលោកនឹងជួបជាមួយលោក Trump ជាលើកដំបូង បន្ទាប់ពីរក្សាទំនាក់ទំនងដ៏តានតឹងចាប់តាំងពីប្រធានាធិបតីសហរដ្ឋអាមេរិកឡើងកាន់តំណែងនៅក្នុងឆ្នាំ២០២៥។ មុនពេលព្រមព្រៀងទៅចូលរួមជំនួបនៅសេតវិមាន លោក Trump បានចោទប្រកាន់លោក Petro ដដែលៗ ដោយមិនផ្តល់ភស្តុតាង ពីការអនុញ្ញាតឱ្យមានលំហូរកូកាអ៊ីនជាបន្តបន្ទាប់ចូលទៅក្នុងសហរដ្ឋអាមេរិក ហើយបាននិយាយសំដៅលើមេដឹកនាំប្រទេសកូឡុំប៊ីរូបនេះថាជា «មនុស្សមានជម្ងឺ»។

កាលពីខែកញ្ញា សហរដ្ឋអាមេរិកបានដកវិញ្ញាបនបត្រកិច្ចខិតខំប្រឹងប្រែងប្រយុទ្ធប្រឆាំងគ្រឿងញៀនរបស់ប្រទេសកូឡុំប៊ី ហើយក្រោយមកបានលុបចោលទិដ្ឋាការរបស់លោក Petro បន្ទាប់ពីលោកបានចូលរួមក្នុងបាតុកម្មគាំទ្រប៉ាឡេស្ទីននៅទីក្រុងញូវយ៉ក ហើយបានជំរុញឱ្យទាហានអាមេរិកមិនស្តាប់បង្គាប់ក្នុងការបញ្ជារបស់លោក Trump។