កាលពីល្ងាចថ្ងៃអង្គារ (២៧ មករា) នាយករដ្ឋមន្ត្រីអង់គ្លេស លោក Keir Starmer បានឆ្ពោះទៅកាន់ប្រទេសចិន សម្រាប់ដំណើរទស្សនកិច្ចលើកដំបូងរបស់មេដឹកនាំអង់គ្លេស ក្នុងរយៈពេល ៨ឆ្នាំ ដើម្បីផ្សះផ្សាទំនាក់ទំនងជាមួយទីក្រុងប៉េកាំង ដែលជាមហាអំណាចសេដ្ឋកិច្ចធំទីពីររបស់ពិភពលោកមួយនេះ និងស្វះស្វែងកាត់បន្ថយការពឹងផ្អែករបស់ចក្រភពអង់គ្លេស ពីសហរដ្ឋអាមេរិក ដែលមានភាពប្រែប្រួលមិនទៀងទាត់កាន់តែខ្លាំងឡើង។

លោក Starmer គឺជាមេដឹកនាំលោកខាងលិចចុងក្រោយបង្អស់ ក្នុងចំណោមមេដឹកនាំលោកខាងលិចមួយចំនួន ដែលបានធ្វើដំណើរទស្សនកិច្ចទៅកាន់ទីក្រុងប៉េកាំង។ ដំណើររបស់លោក កើតឡើងស្របពេលមានភាពតានតឹងរវាងចក្រភពអង់គ្លេស និងសម្ព័ន្ធមិត្តជិតស្និទ្ធយូរអង្វែងរបស់ខ្លួន គឺសហរដ្ឋអាមេរិក ជុំវិញការគំរាមកំហែងថ្មីៗនេះរបស់លោកប្រធានាធិបតី Donald Trump ក្នុងការគ្រប់គ្រងកោះហ្គ្រីនលែន និងសុន្ទរកថាផ្សេងទៀត។

ក្នុងដំណើរទស្សនកិច្ចរយៈពេល ៣ថ្ងៃ អមដោយនាយកប្រតិបត្តិអាជីវកម្មរាប់សិបនាក់ និងរដ្ឋមន្ត្រីពីររូប លោក Starmer នឹងជួបជាមួយប្រធានាធិបតីចិន លោក Xi Jinping និងនាយករដ្ឋមន្ត្រីចិន លោក Li Qiang នៅទីក្រុងប៉េកាំង ហើយបន្ទាប់មក លោកនឹងធ្វើដំណើរទៅកាន់ទីក្រុងសៀងហៃ មុនពេលធ្វើទស្សនកិច្ចរយៈពេលខ្លីមួយទៅកាន់ប្រទេសជប៉ុន។

ចាប់តាំងពីបានជាប់ឆ្នោតនៅឆ្នាំ២០២៤មក លោក Starmer បានចាត់ទុកការកំណត់ទំនាក់ទំនងជាមួយប្រទេសចិនឡើងវិញ គឺជាអាទិភាពមួយរបស់លោក បន្ទាប់ពីការធ្លាក់ចុះនៃទំនាក់ទំនងក្រោមរដ្ឋាភិបាលមុនៗ ដោយសារតែជម្លោះជុំវិញបញ្ហាទីក្រុងហុងកុង ដែលជាអតីតអាណានិគមអង់គ្លេស៕