អង្គការសហប្រជាជាតិ បាននិយាយកាលពីថ្ងៃអង្គារថា មនុស្សជាង ១៧០.០០០នាក់ នៅភាគឦសានប្រទេសស៊ីរី ត្រូវបានផ្លាស់ទីលំនៅ នៅខែនេះ ដោយសារតែការប៉ះទង្គិចគ្នានៅក្នុងខេត្តជាច្រើន ហើយភ្នាក់ងារជំនួយ កំពុងបង្កើនកិច្ចខិតខំប្រឹងប្រែងសង្គ្រោះ ចំពេលមានស្ថានភាពសន្តិសុខផុយស្រួយ និងលក្ខខណ្ឌរដូវរងាដ៏អាក្រក់។

លោក Stephane Dujarric អ្នកនាំពាក្យ UN បានប្រាប់អ្នកយកព័ត៌មាននៅទីក្រុងញូវយ៉កថា តំបន់ដែលរងផលប៉ះពាល់ដោយការផ្លាស់ទីលំនៅ ចាប់តាំងពីថ្ងៃទី 0៦ ខែមករា រួមមានផ្នែកខ្លះនៃខេត្ត Aleppo, Hasakeh និង Raqqa។ លោកបាននិយាយថា ទីតាំងជាច្រើនសម្រាប់ជនភៀសខ្លួនឥឡូវនេះមានមនុស្សច្រើនពេក ហើយស្ថានភាពនៅខេត្ត Hasakeh នៅតែអស្ថិរភាព។

លោក Dujarric បានបន្ថែមថា ក្បួនរថយន្តមនុស្សធម៌អន្តរភ្នាក់ងារមួយចេញពីទីក្រុងដាម៉ាស បានទៅដល់ទីក្រុង Qamishli ក្នុងខេត្ត Hasakeh កាលពីថ្ងៃអង្គារ ដើម្បីដឹកជញ្ជូនអាហារ សម្លៀកបំពាក់រក្សា    កម្តៅ និងភួយ ហើយក្បួនរថយន្តជាច្រើនទៀត ត្រូវបានគ្រោងនឹងចេញដំណើរ នៅក្នុងថ្ងៃខាងមុខនេះ។ ភ្នាក់ងារជំនួយ ក៏កំពុងចែកចាយនំប៉័ង និងអាហារផ្សេងទៀត និងប្រាក់សុទ្ធ ដើម្បីទិញសម្ភារៈ នៅតាមទីតាំងផ្លាស់ទីលំនៅ និងកន្លែងសមូហភាពផ្សេងទៀត។ 

រលកនៃការផ្លាស់ទីលំនៅចុងក្រោយបំផុតនេះ បានកើតមានឡើង បន្ទាប់ពីអំពើហិង្សាជាច្រើនសប្តាហ៍ នៅភាគខាងជើង និងឦសានប្រទេសស៊ីរី រវាងកងកម្លាំងប្រជាធិបតេយ្យស៊ីរី (SDF)ដែលដឹកនាំដោយជនជាតិឃើដ កងទ័ពរដ្ឋាភិបាល និងក្រុមប្រដាប់អាវុធសម្ព័ន្ធមិត្ត ដែលបានផ្ទុះឡើងនៅក្នុងតំបន់ជាច្រើននៅចុងឆ្នាំមុន ហើយបានបន្តរហូតដល់ឆ្នាំថ្មីនេះ៕