ក្រសួងអប់រំ យុវជន និងកីឡា ដោយមានកិច្ចសហការពីមន្ត្រីជំនាញនៃ KOICA ប្រទេសកូរ៉េ បាន​អនុវត្ត​គម្រោងរួមគ្នា ដោយផ្តោតលើការប្រើប្រាស់បច្ចេកវិទ្យា ICT ក្នុងជួយដល់​ដំណើរ​ការ​សិក្សា​លើ​មុខវិជ្ជា STEM សម្រាប់សិស្សកម្រិតអនុវិទ្យាល័យ។ បច្ចុប្បន្នក្រសួងអប់រំ និង KOICA បាន​នឹង​កំពុង​អនុវត្តគម្រោងមួយនេះលើសាលារៀនគោលដៅចំនួន ២០។

ការប្រើ​ប្រាស់បច្ចេកវិទ្យា ICT ក្នុងជួយដល់ដំណើរការសិក្សាលើមុខវិជ្ជា STEM សម្រាប់​សិស្ស​កម្រិត​អនុវិទ្យាល័យ នេះ បច្ចុប្បន្នបានអនុវត្តលើពីរកម្រិតថ្នាក់រួចមកហើយ គឺថ្នាក់ទី ៧ និង​ថ្នាក់​ទី៨ លើសាលារៀនគោលដៅទាំង ២០ នៅខេត្តកណ្ដាល ព្រៃវែង កំពង់ចាម និងខេត្តតាកែវ។ បច្ចុប្បន្នមន្ត្រីជំនាញនៃក្រសួងអប់រំ និងមន្ត្រីជំនាញនៃ KOICA កំពុងធ្វើការ​បណ្ដុះ​បណ្ដាល​លើ​គរុ​និស្សិត ក៏ដូចជាគ្រូបង្រៀនថ្នាក់ទី ៩ មកពីសាលារៀនគោលដៅទាំង ២០ លើសៀវភៅ​គោល​ដែល​ត្រូវ​បានរៀបចំឡើង ក៏ដូចជាការប្រើប្រាស់បច្ចេកវិទ្យា ICT ដែលជាជំនួយ​ដល់​ការ​បង្រៀន​មុខ​វិជ្ជា​ STEM។

លោក ជ សុភា ប្រធានដេប៉ាតឺម៉ង់ ICT នៃវិទ្យាស្ថានគរុកោសល្យ រាជធានីភ្នំពេញ លើកឡើងថា វា​ជា​ភាព​ចាំបាច់ក្នុងការប្រើប្រាស់ ICT ក្នុងការជួយដល់ការយល់ដឹងរបស់សិស្សលើ មុខវិជ្ជាទាំង ៥ ដែលរួមមានរូបវិទ្យា ជីវវិទ្យា គីមីវិទ្យា ផែនដីវិទ្យា និងគណិតវិទ្យា។ លោកបញ្ជាក់ថា ការ​ប្រើ​ប្រាស់ ​ICT ជាជំនួយនេះ នឹងជួយឱ្យសិស្សយល់ដឹងកាន់តែស៊ីជម្រៅ តាមរយៈ​ការ​អនុវត្ត​ផ្ទាល់​លើ​ទូរស័ព្ទ​ដៃ ចៀសជាងការសិក្សាត្រឹមតែទ្រឹះស្ដី។

សម្រាប់គរុនិស្សិត និងគ្រូបង្រៀនថ្នាក់ទី៩ មកពីសាលារៀនគោលដៅទាំង ២០ ដែល​កំពុង​ទទួល​បាន​ការ​បណ្ដុះបណ្ដាលរយៈពេលប៉ុន្មានថ្ងៃមកនេះ លើកឡើងថា នេះជាការ​បណ្ដុះ​បណ្ដាល​ដែល​មាន​អត្ថ​ប្រយោជន៍ជាច្រើន សម្រាប់ការផ្ទេរចំណេះដឹងទៅកាន់សិស្ស ជួយឱ្យ​សិស្ស​ងាយ​សិក្សា​លើ​មុខ​វិជ្ជា STEM ទាំងនោះ។

សម្រាប់គម្រោងមួយនេះ មានឈ្មោះជាផ្លូវការថា គម្រោង​កសាង​សមត្ថភាព​បច្ចេក​វិទ្យា​ព័ត៌មាន​សម្រាប់​ការ​អប់រំនៅមធ្យមសិក្សា បឋមភូមិ នៅកម្ពុជា។ ការអនុគម្រោងនេះ មានការចាប់​ផ្ដើម​ពី​ឆ្នាំ២០២១ ដោយគ្រោងបញ្ចប់នៅចុងឆ្នាំ ២០២៦នេះ។ ចំពោះទីតាំងអនុវត្តគម្រោង រួមមាន​មជ្ឈ​មណ្ឌល​គរុកោសល្យភូមិភាគ ៤ និងសាលារៀនគោលដៅទាំង ២០ ដែលស្ថិតនៅខេត្តកណ្ដាល តាកែវ ព្រៃវែង និងខេត្តកំពង់ចាម។

ជា​ការ​គ្រោងក្រសួងអប់រំ ក៏នឹងចែករំលែកសៀវភៅគោលទាំង ៣កម្រិតថ្នាក់ និង​ធ្វើ​ការ​បណ្ដុះ​បណ្ដាល​បន្ថែម ទៅកាន់សាលារៀនដទៃ ក្រៅពីសាលារៀនគោលដៅផងដែរ៕ អត្ថបទ៖ គឹមហុក