អ៊ីរ៉ង់បានឲ្យដឹងថា ខ្លួនបន្ត «គ្រប់គ្រងទាំងស្រុង» ទាំងដីគោក ដែនទឹក និងដែនអាកាសនៃច្រកសមុទ្រហ័រមូស (Hormuz) ស្របពេលមានក្ដីបារម្ភខ្លាំងឡើងៗ អំពីការវាយប្រហាររបស់សហរដ្ឋអាមេរិក លើទីក្រុងតេអេរ៉ង់។

មេបញ្ជាការកងឆ្មាំបដិវត្តន៍ឥស្លាម (IRGC) លោក Mohammad Akbarzadeh បានលើកឡើងនៅក្នុងការអត្ថាធិប្បាយដែលចុះផ្សាយដោយទីភ្នាក់ងារសារព័ត៌មាន Fars News Agency ថា៖ «អ៊ីរ៉ង់មិនកំពុងស្វែងរកសង្គ្រាមទេ ប៉ុន្តែបានត្រៀមខ្លួនរួចរាល់ហើយ»។ លោកបានសង្កត់ធ្ងន់ថា៖ «ប្រសិនបើសង្គ្រាមផ្ទុះឡើង នឹងមិនមានការដកថយជាដាច់ខាត សូម្បីតែមួយមីលីម៉ែត្រ ហើយអ៊ីរ៉ង់នឹងបន្តទៅមុខ»។

លោក Akbarzadeh បានបញ្ជាក់ថា ការគ្រប់គ្រងលើផ្លូវយុទ្ធសាស្ត្រ «បានប្ដូរហួសពីវិធីសាស្រ្តប្រពៃណី ហើយឥឡូវនេះ មានភាពវៃឆ្លាតបែបទំនើបទាំងស្រុងតែម្ដង» ដែលអាចឲ្យប្រទេសអ៊ីរ៉ង់បន្តការត្រួតពិនិត្យជាប្រចាំលើចរាចរណ៍តាមសមុទ្រទាំងអស់ ទាំងនៅលើផ្ទៃទឹក និងក្រោមទឹក។

លោកបាននិយាយទៀតថា៖ «ជាមួយគ្នានេះ អ៊ីរ៉ង់ក៏គ្រប់គ្រងផងដែរនូវការសម្រេច ជុំវិញថា តើនាវាដែលមានទង់ជាតិផ្សេងៗគ្នា ត្រូវបានអនុញ្ញាតឲ្យឆ្លងកាត់ច្រកសមុទ្រដែរ ឬអត់»។ ហើយលោកបានព្រមានថា «អ៊ីរ៉ង់មិនចង់ឲ្យសេដ្ឋកិច្ចពិភពលោកប៉ះពាល់នោះទេ» ដោយបន្ថែមថា សហរដ្ឋអាមេរិក និងសម្ព័ន្ធមិត្តរបស់ខ្លួន «នឹងមិនអាចបណ្ដោយឲ្យទទួលបានអត្ថប្រយោជន៍ពីសង្គ្រាមដែលពួកគេចាប់ផ្តើមនោះឡើយ»។

លើសពីនេះទៀត លោក Akbarzadeh បានព្រមានថា ប្រសិនបើដីគោក ដែនអាកាស ឬដែនទឹករបស់ប្រទេសជិតខាង ត្រូវបានប្រើប្រាស់ប្រឆាំងនឹងអ៊ីរ៉ង់ ពួកគេនឹងត្រូវបានចាត់ទុកថា ជា «គូសត្រូវ»។ លោកបានប្រាប់ថា៖ «សារនេះត្រូវបានបញ្ជូនទៅកាន់ភាគីក្នុងតំបន់រួចហើយ»។

គួរបញ្ជាក់ថា ភាពតានតឹងបានកើនឡើង រវាងទីក្រុងតេអេរ៉ង់ និងវ៉ាស៊ីនតោន បន្ទាប់ពីមានការតវ៉ាប្រឆាំងរដ្ឋាភិបាល នៅអ៊ីរ៉ង់ ដោយរដ្ឋបាលអាមេរិក ប្រាប់ថា ជម្រើសទាំងអស់ រួមទាំងវិធានការយោធា នៅតែមាននៅលើតុ ក្នុងការដោះស្រាយជាមួយទីក្រុងតេអេរ៉ង់។ ហើយមន្ត្រីអ៊ីរ៉ង់ បានព្រមានថា ការវាយប្រហារណាមួយរបស់សហរដ្ឋអាមេរិក នឹងធ្វើឲ្យមានការឆ្លើយតបយ៉ាងលឿនរហ័ស និងទូលំទូលាយ៕