នៅថ្ងៃពុធនេះ រដ្ឋាភិបាលជប៉ុន បានថ្កោលទោសការបាញ់មីស៊ីលបាលីស្ទិករបស់កូរ៉េខាងជើង ដោយពួកគេចាត់ទុកកម្មវិធីអភិវឌ្ឍន៍នុយក្លេអ៊ែរ និងមីស៊ីលរបស់ប្រទេសមួយនេះ មិនអាចទទួលយកបាននោះទេ ។

ថ្លែងនៅក្នុងសន្និសីទសារព័ត៌មាននៅទីក្រុងតូក្យូ អនុរដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីលោក Kei Sato និយាយថា ការបាញ់មីស៊ីលរបស់កូរ៉េខាងជើងកាលពីថ្ងៃអង្គារ បានគំរាមកំហែងដល់សុវត្ថិភាពសាធារណៈ ទាំងនៅជប៉ុន និងនៅជុំវិញពិភពលោក ។

នាយសេនាធិការចម្រុះកូរ៉េខាងត្បូង និយាយថា មីស៊ីលត្រូវបានបាញ់ចេញពីតំបន់នៅជិតរដ្ឋធានីព្យុងយ៉ាងរបស់កូរ៉េខាងជើង កាលពីវេលាម៉ោង ៣ និង ៥០នាទីរសៀល ម៉ោងក្នុងស្រុក ថ្ងៃអង្គារ ឆ្ពោះទៅកាន់សមុទ្រជិតតំបន់ឆ្នេររបស់ខ្លួន ។ ពួកគេបន្តថា មីស៊ីលនេះ ហោះបានចម្ងាយប្រហែល ៣៥០គ.ម ។

ការបាញ់មីស៊ីលចុងក្រោយនេះដែរ បានកើតមានឡើង អំឡុងដំណើរទស្សនកិច្ចផ្លូវការរបស់មន្រ្តីជាន់ខ្ពស់ក្រសួងការពារជាតិសហរដ្ឋអាមេរិក ទៅកាន់កូរ៉េខាងត្បូង ជាទីដែលលោកពិភាក្សាលើការធ្វើទំនើបកម្មសម្ព័ន្ធភាពយោធារបស់ពួកគេ ស្របពេលដែលទីក្រុងវ៉ាស៊ីនតោន ព្យាយាមស្វែងរកតួនាទីមានដែនកំណត់ជាងមុននៅកិច្ចខិតខំការពាររួមគ្នា ប្រឆាំងនឹងកូរ៉េខាងជើង ៕