ប្រធានាធិបតីស៊ីរី លោក Ahmed al-Sharaa បានជួបជាមួយសមភាគីរុស្ស៊ី លោក Vladimir Putin សម្រាប់កិច្ចពិភាក្សានៅទីក្រុងមូស្គូកាលពីថ្ងៃពុធ ទី២៨ ខែមករា ខណៈវិមានក្រឹមឡាំងស្វែងរកការទទួលបាននៅអនាគតនៃមូលដ្ឋានយោធាដ៏សំខាន់សម្រាប់ប្រតិបត្តិការរបស់ខ្លួននៅតំបន់មជ្ឈិមបូព៌ា។

រុស្ស៊ី គឺជាសម្ព័ន្ធមិត្តដ៏សំខាន់របស់អ្នកកាន់តំណែងមុនលោក Sharaa គឺលោក Bashar al-Assad ក្នុងអំឡុងពេលសង្គ្រាមស៊ីវិលស៊ីរីរយៈពេល១៤ឆ្នាំ។ ការផ្តួលរំលំលោកនៅក្នុងដៃរបស់កងកម្លាំងក្រុមឧទ្ទាមរបស់លោក Sharaa បានបង្កផលប៉ះពាល់យ៉ាងខ្លាំងដល់ឥទ្ធិពលរបស់រុស្ស៊ីនៅក្នុងតំបន់ និងបានធ្វើឱ្យស្ថានភាពនៃមូលដ្ឋានយោធានៅក្នុងប្រទេសស៊ីរី ស្ថិតក្នុងភាពមន្ទិលសង្ស័យ។

លោក Putin បានខិតខំកសាងទំនាក់ទំនងជាមួយលោក Sharaa ចាប់តាំងពីពេលនោះមក ទោះបីជាការបន្តផ្តល់ទីជ្រកកោនដល់លោក Assad និងភរិយារបស់លោកនៅទីក្រុងមូស្គូប្រទេសរុស្ស៊ីនៅតែជាឧបសគ្គចម្បងក្នុងការធ្វើឲ្យប្រសើរទំនាក់ទំនងក៏ដោយ។ លោក Putin បានថ្លែងនៅក្នុងកិច្ចប្រជុំតាមទូរទស្សន៍ជាមួយលោក Sharaa ថា «មានកិច្ចការជាច្រើនត្រូវសម្រេចបានទាក់ទងនឹងការស្តារទំនាក់ទំនងអន្តររដ្ឋឡើងវិញ»។ លោកPutin បាននិយាយទំនងជាសំដៅទៅលើការវាយលុកកាលពីថ្មីៗនេះរបស់លោក Sharaa ប្រឆាំងកងកម្លាំងឃឺដនៅភាគឦសានប្រទេសស៊ីរីថា «យើងបានតាមដានយ៉ាងដិតដល់នូវកិច្ចខិតខំប្រឹងប្រែងរបស់អ្នកក្នុងការស្តារបូរណភាពទឹកដីរបស់ប្រទេសស៊ីរីឡើងវិញ ហើយខ្ញុំអបអរអ្នកចំពោះសន្ទុះដែលដំណើរការនេះកំពុងទទួលបាន»។ លោក Sharaa នៅក្នុងជំនួបលើកទីពីររបស់លោកជាមួយលោកPutinចាប់តាំងពីឡើងកាន់អំណាច បាននិយាយថា រុស្ស៊ីមាន «តួនាទីជាប្រវត្តិសាស្ត្រមិនត្រឹមតែនៅក្នុងការឯកភាព និងស្ថិរភាពរបស់ប្រទេសស៊ីរីប៉ុណ្ណោះទេ ប៉ុន្តែថែមទាំងនៅក្នុងតំបន់ទាំងមូលផងដែរ»។ គ្មាននរណាម្នាក់បានលើកឡើងពីវត្តមានយោធារបស់រុស្ស៊ីនៅក្នុងប្រទេសស៊ីរីទេ ទោះបីជាអ្នកនាំពាក្យរបស់លោកPutin លោក Dmitry Peskov បាននិយាយកាលពីពេលដំបូងថា លោក «ពុំមានការសង្ស័យនោះទេ» ថា បញ្ហានេះនឹងលេចឡើងនៅក្នុងកិច្ចពិភាក្សារបស់មេដឹកនាំប្រទេសទាំងពីរ។