ទីភ្នាក់ងារអាកាសធាតុជាតិ បាននិយាយនៅថ្ងៃព្រហស្បតិ៍ (២៩ មករា) នេះថា តំបន់ភាគខាងជើង និងខាងលិចនៃប្រទេសជប៉ុន នឹងប្រឈមព្យុះព្រិលដ៏ខ្លាំងក្លាបន្ថែមទៀតនៅចុងសប្តាហ៍នេះ ខណៈសមាជិកសភាកំពុងធ្វើយុទ្ធនាការបោះឆ្នោតរដូវរងាលើកដំបូងបំផុតក្នុងរយៈពេល ៣៦ឆ្នាំ ដោយមានហានិភ័យនៃចំនួនអ្នកទៅបោះឆ្នោតទាប ព្រោះតែអាកាសធាតុត្រជាក់ខ្លាំង។

ទីភ្នាក់ងារឧតុនិយមបាននិយាយថា ព្រិលធ្លាក់ខ្លាំងរហូតដល់ ៧០សង់ទីម៉ែត្រ នៅតំបន់ Hokuriku ភាគពាយព្យនៃប្រទេសជប៉ុន និង ៦០សង់ទីម៉ែត្រ នៅភាគខាងត្បូង-កណ្តាល Kinki ជាពិសេសតាមបណ្តោយសមុទ្រជប៉ុន ត្រូវបានព្យាករទុក រហូតដល់ថ្ងៃសុក្រ ស្អែកនេះ ដោយជំរុញឱ្យមានការប្រុងប្រយ័ត្នពីលទ្ធភាពនៃការរំខានចរាចរណ៍ និងហានិភ័យនៃការបាក់ផ្ទាំងព្រិលធំៗ។

ព្រិលធ្លាក់ខ្លាំងកាលពីសប្តាហ៍មុន បានធ្វើឱ្យកោះ Hokkaido ភាគខាងជើងប្រទេសជប៉ុន ស្ថិតក្នុងសភាពជាប់គាំងម្ដងរួចមកហើយ ដោយធ្វើឱ្យមនុស្សរាប់ពាន់នាក់ជាប់គាំងនៅអាកាសយានដ្ឋានសំខាន់របស់ខ្លួនពេញមួយយប់ ដោយសារជើងហោះហើររាប់សិបជើង ត្រូវបានលុបចោល។

ជប៉ុន គ្រោងរៀបចំការបោះឆ្នោតសភាជាន់ទាបនៅថ្ងៃទី៨ ខែកុម្ភៈ ហើយការធ្លាក់ព្រិលខ្លាំងនៅភាគខាងជើងនៃប្រទេស អាចធ្វើឱ្យអ្នកចេញទៅបោះឆ្នោតថយចុះ និងរំខានដល់យុទ្ធនាការឃោសនាបោះឆ្នោត ជាពិសេសនៅតំបន់ជនបទ ដែលបន្ថែមភាពមិនប្រាកដប្រជាមួយទៀតដល់ការបោះឆ្នោតមុនអាណត្តិបែបនេះ។ ការស្ទង់មតិបឋមមួយដោយកាសែត Nikkei បានបង្ហាញនៅថ្ងៃព្រហស្បតិ៍នេះថា គណបក្សប្រជាធិបតេយ្យសេរីនិយម របស់នាយករដ្ឋមន្ត្រីជប៉ុន លោកស្រី Sanae Takaichi ទំនងជានឹងបង្កើនចំនួនអាសនៈសភារបស់ខ្លួន និងទទួលបានសំឡេងភាគច្រើននៅក្នុងសភាជាន់ទាប៕