ប្រធានសភាអ៊ីរ៉ង់ លោក Mohammad Bagher Ghalibaf បានថ្លែងថា ទីក្រុងតេអេរ៉ង់បើកចំហសម្រាប់ការចរចាជាមួយរដ្ឋបាលសហរដ្ឋអាមេរិក ប្រសិនបើទីក្រុងវ៉ាស៊ីនតោន ពិតជាត្រៀមខ្លួនរួចជាស្រេចសម្រាប់ការសន្ទនាលើកិច្ចព្រមព្រៀងដែលអាចកើតមាន។ 

លោកបាននិយាយនៅក្នុងបទសម្ភាសន៍ជាមួយសារព័ត៌មាន CNN ថា៖«ប្រសិនបើទាំងនេះ ជាការចរចាពិតប្រាកដ ដើម្បីឈានដល់កិច្ចព្រមព្រៀងក្នុងក្របខ័ណ្ឌនៃបទប្បញ្ញត្តិអន្តរជាតិ នោះគឺយល់ព្រម។ ប៉ុន្តែនោះ គឺមិនមែនជាប្រភេទនៃការចរចាដែលប្រធានាធិបតីអាមេរិក លោក ដូណាល់ ត្រាំ ចង់បានទេ។ លោកគ្រាន់តែចង់ដាក់ឆន្ទៈរបស់លោកលើអ្នកដទៃប៉ុណ្ណោះ»។

លោកបានលើកឡើងថា៖«តាមគំនិតរបស់ខ្ញុំ ប្រសិនបើលោក ត្រាំ ពិតជាស្មោះត្រង់ ហើយកំពុងស្វែងរកសន្តិភាព និងចង់ទទួលបានរង្វាន់ណូបែលសន្តិភាព លោកត្រូវឆ្ពោះទៅរកសន្តិភាពពិតប្រាកដ ហើយសកម្មភាពដំបូងរបស់លោក ត្រូវតែរំដោះខ្លួនចេញពីអ្នកបង្កសង្គ្រាម និងអ្នកដែលស្វែងរកការចុះចូលរបស់អ៊ីរ៉ង់»។ «ប្រហែលជាលោក ត្រាំ អាចចាប់ផ្តើមសង្គ្រាមបាន ប៉ុន្តែលោកមិនមានការគ្រប់គ្រងលើទីបញ្ចប់នោះទេ។ ទាហានអាមេរិករាប់ពាន់នាក់ដែលកំពុងត្រូវបានដាក់ពង្រាយ ទៅកាន់មជ្ឈិមបូព៌ា ចម្ងាយរាប់ពាន់គីឡូម៉ែត្រពីប្រទេសនោះ ពិតជានឹងរងគ្រោះថ្នាក់ ដែលមិនមែនជារឿងល្អនោះទេ»។

នាពេលមុននេះ ទីប្រឹក្សារបស់មេដឹកនាំកំពូលអ៊ីរ៉ង់ លោក Ali Shamkhani បាននិយាយថា ទីក្រុងតេអេរ៉ង់ នឹងចាត់ទុកសកម្មភាពឈ្លានពានណាមួយរបស់សហរដ្ឋអាមេរិកថា ជាការចាប់ផ្តើមនៃសង្គ្រាមទ្រង់ទ្រាយធំ ហើយបានព្រមានអំពីការឆ្លើយតបរបស់អ៊ីរ៉ង់៕