លោក Marco Rubio រដ្ឋមន្ត្រីការបរទេស និងជាទីប្រឹក្សាសន្តិសុខជាតិអាមេរិក បាននិយាយថា សហរដ្ឋអាមេរិកមិនបោះបង់ចោលអង្គការណាតូទេ ប៉ុន្តែមានគម្រោងពិនិត្យឡើងវិញនូវការដាក់ពង្រាយកងកម្លាំងរបស់ខ្លួននៅជុំវិញពិភពលោក។ 

លោកបានថ្លែងនៅក្នុងកិច្ចប្រជុំគណៈកម្មាធិការទំនាក់ទំនងការបរទេសព្រឹទ្ធសភាអាមេរិកថា៖«អ្វីដែលយើងកំពុងធ្វើនោះ មិនមានន័យថា យើងកំពុងបោះបង់ចោលអង្គការណាតូ ឬបោះបង់ចោលអឺរ៉ុបនោះទេ។ វាមានន័យថា យើងនឹងត្រូវកែសម្រួលឥរិយាបថកងកម្លាំងរបស់យើងឡើងវិញ នៅចំណុចណាមួយនៅក្នុងពិភពលោក ដើម្បីដោះស្រាយជាមួយនឹងការពិតទាំងអស់នេះ»។

លោកបានបន្ថែមថា៖«សម្ព័ន្ធមិត្តរបស់យើងកាន់តែរឹងមាំ និងសម្ព័ន្ធមិត្តរបស់យើង នៅក្នុងអង្គការណាតូកាន់តែមានសមត្ថភាព យើងនឹងមានភាពបត់បែនកាន់តែច្រើន ក្នុងការធ្វើដូច្នេះ។ យើងនឹងនៅតែនៅទីនោះ ជាមួយនឹងការធានារបស់     យើង។ យើងនឹងនៅតែនៅទីនោះ ជាមួយនឹងវត្តមានរបស់យើង។ យើងនឹងនៅតែមានការដាក់ពង្រាយយោធាដ៏ធំបំផុតមួយចំនួន នៅក្នុងពិភពលោក។ យើងនឹងនៅអឺរ៉ុបជាមួយសម្ព័ន្ធមិត្តរបស់យើង ប៉ុន្តែយើងនឹងត្រូវការភាពបត់បែនមួយចំនួន ដើម្បីធ្វើបែបនេះ តាមពេលវេលា»៕