សារព័ត៌មានគាំទ្ររដ្ឋាភិបាលទួរគី Hurriyet បានរាយការណ៍ថា លោកប្រធានាធិបតី រ៉េសិប តាយីប អឺដូហ្កាន់ ( Recep Tayyip Erdogan) បានទាក់ទងសមភាគីអាមេរិករបស់ខ្លួន គឺលោក ដូណាល់ ត្រាំ ដោយស្នើឲ្យរៀបចំកិច្ចប្រជុំកំពូលត្រីភាគីស្តីពីអ៊ីរ៉ង់។ 

យោងតាមកាសែតនេះ លោក អឺដូហ្កាន់ បានសម្តែងគំនិតផ្តួចផ្តើមនេះ ក្នុងអំឡុងពេលសន្ទនាតាមទូរស័ព្ទជាមួយលោក ត្រាំ កាលពីថ្ងៃទី ២៧ ខែមករា។ មេដឹកនាំទួរគីរូបនេះ បានអំពាវនាវឲ្យមានការរៀបចំកិច្ចប្រជុំកំពូលដែលពាក់ព័ន្ធនឹងសហរដ្ឋអាមេរិក អ៊ីរ៉ង់ និងទួរគី ប្រហែលជាតាមរយៈតំណភ្ជាប់វីដេអូ។ សារព័ត៌មាននេះ បានសរសេរថា៖«តាមសេចក្តីរាយការណ៍ លោក ត្រាំ មានទស្សនៈវិជ្ជមានចំពោះសំណើរបស់លោក អឺដូហ្កាន់។

កាសែតនេះ ក៏បានរាយការណ៍ផងដែរថា រដ្ឋមន្ត្រីការបរទេសអ៊ីរ៉ង់ លោក Abbas Araghchi ត្រូវបានគេរំពឹងថា នឹងធ្វើទស្សនកិច្ចប្រទេសទួរគី នៅចុងសប្តាហ៍នេះ ដើម្បីធ្វើការចរចាជាមួយសមភាគីទួរគីរបស់ខ្លួន គឺលោក Hakan Fidan។ ពុំមានកាលបរិច្ឆេទជាក់លាក់ណាមួយ ត្រូវបានប្រកាសនោះទេ។

កិច្ចពិភាក្សាតាមទូរស័ព្ទចុងក្រោយបំផុតរវាងប្រមុខការទូតទួរគី និងអ៊ីរ៉ង់ ត្រូវបានធ្វើឡើង នៅថ្ងៃទី ២៨ ខែមករា ហើយផ្តោតលើការវិវត្តថ្មីៗជុំវិញអ៊ីរ៉ង់ និងកិច្ចខិតខំប្រឹងប្រែងឆ្ពោះទៅរកការបន្ធូរបន្ថយភាពតានតឹង នៅក្នុងតំបន់។

លោក Akif Cagatay Kilic ទីប្រឹក្សាគោលនយោបាយការបរទេស និងសន្តិសុខរបស់លោក អឺដូហ្កាន់ បានប្រាប់ប៉ុស្តិ៍ទូរទស្សន៍ TRT Haber កាលពីល្ងាចថ្ងៃពុធថា ទីក្រុងអង់ការ៉ាសង្ឃឹមថា ស្ថានភាពជុំវិញអ៊ីរ៉ង់ នឹងត្រូវដោះស្រាយតាមរយៈការទូត។ យោងតាមលោក Kilic ភាគីទួរគីទទូចថា ការជ្រៀតជ្រែកពីបរទេសក្នុងកិច្ចការរបស់អ៊ីរ៉ង់ នឹងមិននាំមកនូវលទ្ធផលវិជ្ជមានណាមួយឡើយ៕