វៀតណាម និងសហភាពអឺរ៉ុប (EU) នៅថ្ងៃព្រហស្បតិ៍ (ទី២៩ ខែមករា) នេះ បានសន្យាពង្រឹងកិច្ចសហប្រតិបត្តិការផ្នែកសេដ្ឋកិច្ច និងសន្តិសុខ ដោយធ្វើឲ្យប្រសើរឡើងនូវទំនាក់ទំនងការទូតរបស់ភាគីទាំង២ ដើម្បីការពារខ្លួនទល់នឹងសហរដ្ឋអាមេរិក ដែលមានគោលនយោបាយកាន់តែមិនអាចទាយទុកមុនបាន។

ក្នុងអំឡុងពេលទស្សនកិច្ចនៅទីក្រុងហាណូយ ប្រទេសវៀតណាម ប្រធានក្រុមប្រឹក្សាអឺរ៉ុប លោក Antonio Costa បានលើកឡើងថា វៀតណាម និង EU ត្រូវតែ «ឈរជាមួយគ្នា ក្នុងនាមជាដៃគូដែលអាចទុកចិត្តបាន និងអាចទាយទុកជាមុនបាន» នៅពេលដែល «សណ្តាប់ធ្នាប់ផ្អែកលើច្បាប់អន្តរជាតិ កំពុងស្ថិតក្រោមការគំរាមកំហែង»។

អំឡុងពេលនិយាយនៅឯសន្និសីទសារព័ត៌មានរួមគ្នា លោកប្រធានាធិបតី Luong Cuong បានចាត់ទុកការធ្វើឲ្យប្រសើរឡើងនូវភាពជាដៃគូកម្រិតខ្ពស់របស់វៀតណាមនេះថា ជា «ដំណាក់កាលថ្មី» ដែលឆ្លុះបញ្ចាំងពី «ការជឿទុកចិត្តប្រកបដោយភាពស្មោះត្រង់ និងទៅវិញទៅមក»។

ការប្រកាសអំពីភាពជាដៃគូយុទ្ធសាស្ត្រដ៏ទូលំទូលាយនេះ បានកើតឡើងមិនដល់មួយសប្តាហ៍ផង បន្ទាប់ពីគណបក្សកុម្មុយនីស្តវៀតណាម បានបញ្ជាក់អះអាងឡើងវិញជាថ្មីថា អគ្គលេខាធិការបក្ស លោក To Lam គឺជាមេដឹកនាំកំពូលរបស់ប្រទេស ដោយគាំទ្រចក្ខុវិស័យរបស់លោក សម្រាប់ការផ្លាស់ប្តូរដែលផ្តោតលើកំណើនយ៉ាងទូលំទូលាយ។

វៀតណាម និង EU បានចុះហត្ថលេខាលើកិច្ចព្រមព្រៀងពាណិជ្ជកម្មសេរី ក្នុងឆ្នាំ២០១៩ ដោយការដោះដូរទំនិញទ្វេភាគី កើនឡើងប្រហែល ៤០ភាគរយ ចាប់តាំងពីពេលនោះមក។ ប៉ុន្តែអតិរេករបស់ទីក្រុងហាណូយជាមួយប្លុកនេះ បានធ្វើឲ្យមេដឹកនាំអឺរ៉ុបដែលបានអំពាវនាវឲ្យលុបចោលរបាំងមិនមែនពន្ធលើផលិតផលរបស់ EU ដូចជារថយន្តជាដើម មានការខឹងសម្បា។ បើតាមសេចក្តីថ្លែងការណ៍រួម បានបង្ហាញថា ភាគីទាំង២ បានព្រមព្រៀងគ្នានៅថ្ងៃព្រហស្បតិ៍នេះ ដើម្បីពង្រឹងកិច្ចសហប្រតិបត្តិការលើពាណិជ្ជកម្ម បច្ចេកវិទ្យា ថាមពល និងសន្តិសុខ៕