ក្រុមនគរបាលនីហ្សេរីយ៉ា បានបាញ់ឧស្ម័នបង្ហូរទឹកភ្នែក ដើម្បីបំបែកអ្នកស្រុកតវ៉ានៅរដ្ឋ Lagos ប្រឆាំងនឹងការងាររុះរើផ្ទះបណ្តែតទឹករបស់ពួកគេ ស្ថិតក្នុងចំណោមផ្ទះបណ្តែតទឹកក្រីក្រធំបំផុតរបស់អាហ្វ្រិក ដែលនឹងធ្វើឲ្យមនុស្សរាប់ពាន់នាក់ ជម្លៀសខ្លួន ក្នុងនោះបាតុករម្នាក់ ត្រូវបានគេរាយការណ៍ថា រងរបួស ។

ប្រជាពលរដ្ឋខឹងសម្បារ និងគ្រួសាររងផលប៉ះពាល់ជាង ១ពាន់នាក់ បានដង្ហែរក្បួនទៅកាន់សភារដ្ឋ Lagos ដើម្បីបង្ហាញការខឹងសម្បាររបស់ពួកគេចំពោះការរុះរើផ្ទះបណ្តែតទឹកនេះ ។

ក្រុមបាតុករបដិសេធន៍ការបញ្ជារបស់ក្រុមនគរបាលឲ្យបំបែកជួរ តែផ្ទុយទៅវិញ ពួកគេនៅតែបន្តទាមទារ ឲ្យមានការលើកឡើងបញ្ហានេះដោយអភិបាលរដ្ឋ Lagos ដែលការិយាល័យរបស់លោក ស្ថិតនៅក្បែរនោះ ។

គួរឲ្យដឹងថា អ្នកស្រុករាប់ម៉ឺននាក់ដែលរស់នៅក្នុងសហគមន៍បណ្តែតទឹកប្រវត្តិសាស្រ្ត Makoko ស្ថិតលើបឹង Lagos ត្រូវបានគេទុកចោលដោយគ្មានផ្ទះសម្បែងរស់នៅ ក្រោយអាជ្ញាធរនីហ្សេរីយ៉ា រុះរើផ្ទះបណ្តែតទឹករបស់ពួកគេ ធ្វើឲ្យជម្លៀសខ្លួនគ្រួសារធ្លាប់រស់នៅលើបឹង Lagos អស់រយៈពេលរាប់ទសវត្សរ៍មកហើយ ។

អ្នកស្រុកបានត្រឹមឈរមើលផ្ទះឈើរបស់ពួកគេ ត្រូវបានគេរុះរើនៅលើបឹងដែលធ្លាប់ស្ថិតក្នុងចំណោមការតាំងលំនៅបណ្តែតទឹកធំបំផុតរបស់អាហ្វ្រិក ជាទីដែលផ្លូវទឹកដ៏តួចចង្អៀតក្លាយជាផ្លូវ ការនេសាទ និងការជួញដូរក្រៅផ្លូវការ ដើម្បីទ្រទ្រង់ជីវិតរស់នៅប្រចាំថ្ងៃរបស់ពួកគេ ។

សូមបញ្ជាក់ថា សហគមន៍ផ្ទះបណ្តែតទឹក Makoko ប្រឈមនឹងការគំរាមកំហែងបណ្តេញចេញជាយូរមកហើយ ខណៈដែលក្រុមអាជ្ញាធរលើកឡើងពីហានិភ័យបរិស្ថាន ក្តីកង្វល់សុខភាពសាធារណៈ និងផែនការកែលម្អទីក្រុង ។ អ្នកស្រុកជាច្រើនធ្វើការជាអ្នកនេសាទ ហើយបច្ចុប្បន្នពួកគេនិយាយថា ពួកគេគ្មានកន្លែងត្រូវទៅនោះទេ ។

ការប៉ុនប៉ងបោសសម្អាតទីនេះ រួមទាំងការរុះរើផ្ទះកាលពីឆ្នាំ ២០១២ដែរនោះ បានធ្វើឲ្យមានការរិះគន់យ៉ាងខ្លាំងពីក្រុមសិទ្ធិមនុស្ស ពាក់ព័ន្ធនឹងការបណ្តេញចេញទាំងបង្ខំ ដោយគ្មានផែនការផ្តល់ទីជម្រកថ្មីដល់អ្នកស្រុក ៕