រុស្ស៊ី និងអ៊ុយក្រែន នៅថ្ងៃព្រហស្បតិ៍ (ទី២៩ ខែមករា ឆ្នាំ២០២៦) បានប្រាប់ឲ្យដឹងថា ប្រទេសទាំង២ បានធ្វើការដោះដូរសាកសពក្នុងសង្គ្រាមចុងក្រោយបង្អស់ ដែលជាការអនុវត្តជាប្រចាំ ដើម្បីអាចឲ្យសាច់ញាតិរបស់អ្នកដែលបានស្លាប់នៅក្នុងសមរភូមិ បញ្ចុះសពមនុស្សជាទីស្រលាញ់របស់ពួកគេ។

ប្រទេសទាំង២ បានឲ្យដឹងនៅក្នុងសេចក្តីថ្លែងការណ៍ថា រុស្ស៊ីបានប្រគល់សាកសពទាហានអ៊ុយក្រែនចំនួន ១.០០០នាក់ទៅឲ្យអ៊ុយក្រែន។ ហើយជំនួយការវិមានក្រឹមឡាំង លោក Vladimir Medinsky បាននិយាយថា ទីក្រុងគីវ បានប្រគល់សាកសពទាហានរុស្ស៊ី ៣៨នាក់ទៅឲ្យទីក្រុងមូស្គូ។

លោក Medinsky បានបង្ហោះរូបភាពនៅលើកម្មវិធីផ្ញើសារ Telegram អំពីការដោះដូរដែលបង្ហាញពីរថយន្តធ្វើឲ្យត្រជាក់ពណ៌សចតនៅលើតំបន់ដែលគ្របដណ្តប់ដោយព្រិល នៅជាប់នឹងព្រៃមួយ ដែលមានមនុស្សស្លៀកពាក់ឈុតជីវសាស្ត្រពណ៌សឈរនៅជុំវិញ។

មជ្ឈមណ្ឌលសម្របសម្រួលសម្រាប់ការដោះដូរអ្នកទោសរបស់អ៊ុយក្រែន បានបញ្ជាក់ថា ការដោះដូរសាកសពនេះ បានកើតឡើង ដោយបានបញ្ជាក់នៅតាម Telegram ថា រុស្ស៊ីបានប្រគល់សាកសពចំនួន ១.០០០នាក់ទៅឲ្យទីក្រុងគីវ ដែលទីក្រុងមូស្គូអះអាងថា ជារបស់ទាហានអ៊ុយក្រែន។

បើទោះបីទីក្រុងគីវ និងមូស្គូ បន្តការដោះដូរសាកសពក្នុងសង្គ្រាមរបស់ពួកគេជាប្រចាំក៏ដោយ ក៏លើកចុងក្រោយដែលពួកគេបានដោះដូរអ្នកទោសសង្គ្រាម ឬឈ្លើយសឹក គឺនៅក្នុងខែតុលា ឆ្នាំ២០២៥។ ភាគីទាំង២ ចោទប្រកាន់គ្នាទៅវិញទៅមកថា បានពន្យារការដោះដូរអ្នកទោសថ្មី៕