នៅថ្ងៃព្រហស្បតិ៍នេះ វិមានក្រឹមឡាំងនិយាយថា សក្តានុពលសម្រាប់កិច្ចប្រជុំរវាងសហរដ្ឋអាមេរិក និងអ៊ីរ៉ង់ នៅមិនទាន់អស់លទ្ធភាពនោះទេ ហើយរាល់ការប្រើប្រាស់កម្លាំងយោធាប្រឆាំងនឹងទីក្រុងតេអេរ៉ង់ អាចបង្កើតភាពវឹកវរនៅក្នុងតំបន់ ហើយនិងនាំទៅរកផលវិបាកដ៏គ្រោះថ្នាក់ ។

អ្នកនាំពាក្យវិមានក្រឹមឡាំងលោក Dmitry Peskov បានធ្វើសេចក្តីអត្ថាធិប្បាយបែបនេះ រយៈពេល ១ថ្ងៃ ក្រោយប្រធានាធិបតីសហដ្ឋអាមេរិកលោក Donald Trump ជំរុញឲ្យអ៊ីរ៉ង់វិលត្រឡប់មករកតុចរចាវិញ និងបង្កើតកិច្ចព្រមព្រៀងលើអាវុធនុយក្លេអ៊ែរ បើពុំដូច្នោះទេនឹងប្រឈមជាមួយលទ្ធភាពនៃការវាយប្រហាររបស់សហរដ្ឋអាមេរិក ។

ប្រភពជាច្រើនបានប្រាប់សារព័ត៌មានរ៉យទ័រថា លោក Trump កំពុងថ្លឹងថ្លែងជម្រើសនានាប្រឆាំងនឹងអ៊ីរ៉ង់ ដែលរួមមានការវាយប្រហារដាក់គោលដៅលើកងកម្លាំងសន្តិសុខ និងថ្នាក់ដឹកនាំ ដើម្បីជំរុញក្រុមបាតុករឲ្យចេញតាមដងផ្លូវជាថ្មី ប៉ុន្តែប្រភពពីមន្ត្រីអ៊ីស្រាអែល និងអារ៉ាប់និយាយថា កម្លាំងផ្លូវអាកាសតែមួយមុខ មិនអាចផ្តួលរំលំមេដឹកនាំបុព្វជិតរបស់អ៊ីរ៉ង់បានទេ ហើយមានតែធ្វើឲ្យចលនាតវ៉ាចុះខ្សោយទៅវិញប៉ុណ្ណោះ ។

លោក Peskov និយាយថា ពួកយើងបន្តអំពាវនាវដល់ភាគីទាំងអស់ បង្ហាញភាពអត់ធ្មត់ និងងាកចញពីការប្រើប្រាស់កម្លាំងណាមួយ ដើម្បីដោះស្រាយបញ្ហាទាំងនេះ ។

លោកបន្តថា ច្បាស់ណាស់ថា ដំបូង វាចាំបាច់ត្រូវផ្តោតសំខាន់លើយន្តការចរចា ហើយរាល់ការប្រើប្រាស់កម្លាំងណាមួយ មានតែបង្កភាពវឹកវរប៉ុណ្ណោះ ក៏ដូចជាបង្កើតអស្ថិរភាពលើប្រព័ន្ធសន្តិសុខនៅក្នុងតំបន់ ៕