ក្រុមអ្នកស្រុកនៅដែនដី Irumu ស្ថិតក្នុងសាធារណរដ្ឋប្រជាធិបតេយ្យកុងហ្គោ បានរកឃើញសាកសពមនុស្សយ៉ាងហោច ១១នាក់ ក្រោយក្រុមជីវពលមានទំនាក់ទំនងជាមួយក្រុមដ្ឋអ៊ិស្លាម បានសម្លាប់ជនស៊ីវិលជាច្រើននៅតាមភូមិដ្ឋានប្រជាពលរដ្ឋ ស្ថិតនៅភាគខាងកើតប្រទេសមួយនេះ ។

របាយការណ៍ផ្ទៃក្នុងរបស់អង្គការសហប្រជាជាតិ ត្រូវបានមើលឃើញដោយទីភ្នាក់ងារព័ត៌មានរ៉យទ័រ និយាយថា យុទ្ធជនមកពីកងកម្លាំងប្រជាធិបតេយ្យសម្ព័ន្ធមិត្ត(ADF) បានវាយប្រហារភូមិដ្ឋានប្រជាពលរដ្ឋជាច្រើនកន្លែងនៅខេត្ត Ituri តាំងពីព្រឹកថ្ងៃអាទិត្យ ដោយបានសម្លាប់មនុស្សយ៉ាងហោច ២២នាក់ និងចាប់ជម្រិតមនុស្សជាច្រើននាក់ទៀតដែលជាផ្នែកមួយនៃការកញ្ជ្រោលឡើងអំពើហិង្សារបស់ក្រុមមួយនេះ នៅភាគខាងកើតកុងហ្គោ ។ នៅក្នុងភូមិ Otomaber អ្នកស្រុកចាប់ផ្តើមកិច្ចខិតខំស្វែងរកសាកសពមនុស្សតាមតំបន់ព្រៃក្បែរៗភូមិ ។ 

ខណៈពេលនោះដែរ ប្រធានក្រុមសិទ្ធិមនុស្ស អនុសញ្ញាសម្រាប់ការគោរពសិទ្ធិមនុស្ស CRH បាននិយាយថា សោកនាដកម្មនេះ បានឆក់យកជីវិតមនុស្សយ៉ាងហោចណាស់ ២៥ នាក់ ។ ទង្វើរបស់ក្រុម ADF គឺជាការសម្លាប់រង្គាលយ៉ាងពិតប្រាកដ ។ 

សូមញ្ជាក់ថា តំបន់ភាគខាងកើតនៃប្រទេសកុងហ្គោ បានមើលឃើញការវាយប្រហារជាច្រើនលើកច្រើនសារក្នុងរយៈពេលប៉ុន្មានខែចុងក្រោយនេះ ធ្វើឡើងដោយក្រុមប្រដាប់អាវុធនានា រួមទាំងក្រុម ADF និងក្រុមឧទ្ទាម M23 ដែលគាំទ្រដោយប្រទេសរ្វ៉ាន់ដា ៕