យោងតាមការអះអាងរបស់អង្គការជំនួយវ៉ាក់សាំងអន្តរជាតិ Gavi និងសេវាកម្មសុខភាពហ្គាណា បានឲ្យដឹងថា វ៉ាក់សាំងថ្មីដែលនឹងជួយប្រទេសហ្គាណាឲ្យជិតដល់គោលដៅស្វែងរកជាយូរនៃការបញ្ចប់ការស្លាប់របស់កុមារដោយសារជំងឺគ្រុនចាញ់ បង្ហាញពីសក្តានុពលនៃថ្នាំបង្ការ ដើម្បីទប់ស្កាត់ជំងឺមួយដែលបានសម្លាប់កុមារជិតកន្លះលាននាក់ជារៀងរាល់ឆ្នាំនៅទ្វីបអាហ្វ្រិក ។

 អង្គការ Gavi បាននិយាយប្រាប់ទីភ្នាក់ងារព័ត៌មានរ៉យទ័រថា ប៉ុន្តែការកាត់បន្ថយជំនួយដោយរដ្ឋបាលលោក Trump និងរដ្ឋាភិបាលអ្នកមានផ្សេងទៀត អាចមានន័យថា កុមារតិចជាងមុនទទួលបានអត្ថប្រយោជន៍នៅទ្វីបមួយនេះ ជាទីដែលជំងឺគ្រុនចាញ់វាយប្រហារខ្លាំងបំផុត ។

 ហ្គាណាស្ថិតនៅក្នុងចំណោមប្រទេសដែលបានបង្កើតវឌ្ឍនភាពច្រើនរួចទៅហើយ ក្នុងការកាត់បន្ថយអត្រាមរណភាពនៃជំងឺគ្រុនចាញ់ តាមរយៈការបង្កើនការអន្តរាគមន៍ ដូចជាការចែកចាយមុងមានបាញ់ថ្នាំសម្លាប់សត្វល្អិត និងការធ្វើឲ្យល្អប្រសើរឡើង ការទទួលបានថ្នាំបង្ការ និងការព្យាបាលបន្ទាន់ ។

 លោកស្រីវេជ្ជបណ្ឌិត Selorm Kutsoati ដែលដឹកនាំកម្មវិធីចាក់វ៉ាក់សាំងរបស់ហ្គាណា និយាយថា វ៉ាក់សាំងបង្ការថ្មីចំនួន ២ដែលវ៉ាក់សាំងមួយប្រភេទផលិតឡើងដោយក្រុមហ៊ុនផលិតឱសថអង់គ្លេស GSK និងវ៉ាក់សាំងមួយប្រភេទទៀត ផលិតឡើងដោយសាកលវិទ្យាល័យ Oxford និងវិទ្យាស្ថានសេរ៉ូមឥណ្ឌា នឹងជួយបិទគំលាតនៅសេសសល់ ។

 លោកស្រីនិយាយប្រាប់ទីភ្នាក់ងារព័ត៌មានរ៉យទ័រថា សម្រាប់រូបគាត់ វ៉ាក់សាំងបង្ការជំងឺគ្រុនចាញ់ គឺជាអ្នកផ្លាស់ប្តូរហ្គេម ។

 បច្ចុប្បន្ន Gavi គឺជាអង្គការតែមួយគត់ដែលទិញវ៉ាក់សាំងបង្ការជំងឺគ្រុនចាញ់សម្រាប់បណ្តាប្រទេសអាហ្វ្រិក ។ ពួកគេរំពឹងទុកថា ពួកគេនឹងអាចចំណាយប្រាក់ត្រឹមជាង ៨០០លានដុល្លារប៉ុណ្ណោះលើកម្មវិធីចាក់វ៉ាក់សាំងបង្ការជំងឺគ្រុនចាញ់ ក្នុងរយៈពេល ៥ឆ្នាំបន្ទាប់ ពោលគឺមានចំនួន ២៨ភាគរយតិចជាងតម្រូវការតាមការរំពឹងទុក ៕