ចក្រភពអង់គ្លេស និងប្រទេសចិន នៅថ្ងៃព្រហស្បតិ៍ (២៩ មករា) សប្ដាហ៍នេះ បានសាទរចំពោះទំនាក់ទំនងទ្វេភាគីដែលត្រូវបានស្ដារឡើងវិញ បន្ទាប់ពីលោកនាយករដ្ឋមន្ត្រីអង់គ្លេស Keir Starmer និងលោកប្រធានាធិបតីចិន Xi Jinping បានប្ដេជ្ញាថា នឹងសហការគ្នាបន្ថែមទៀតលើពាណិជ្ជកម្ម ការវិនិយោគ និងបច្ចេកវិទ្យា ដើម្បីផលប្រយោជន៍ទៅវិញទៅមករបស់ប្រទេសទាំងពីរ។

ដោយសារមេដឹកនាំលោកខាងលិចកំពុងទប់ទល់នឹងភាពមិនអាចទាយទុកជាមុនបាន របស់លោកប្រធានាធិបតីអាមេរិក Donald Trump លោក Starmer បានក្លាយជាមេដឹកនាំចុងក្រោយបង្អស់ដែលធ្វើទស្សនកិច្ចទៅប្រទេសចិន ជាទីដែលលោកអំពាវនាវឱ្យមាន «ទំនាក់ទំនងដ៏ទំនើបជាងមុន» ជាមួយនឹងសិទ្ធិចូលទៅកាន់ទីផ្សារកាន់តែប្រសើរឡើង ពន្ធគយទាប និងកិច្ចព្រមព្រៀងវិនិយោគ។

ដោយទទួលស្វាគមន៍មេដឹកនាំអង់គ្លេសជាលើកដំបូងក្នុងរយៈពេល ៨ឆ្នាំ ទីក្រុងប៉េកាំងបានយល់ព្រមលើការចូលដោយគ្មានទិដ្ឋាការរយៈពេល ៣០ថ្ងៃ សម្រាប់ជនជាតិអង់គ្លេស និងកាត់បន្ថយពាក់កណ្តាលនៃពន្ធរបស់ចិន លើស្រាវីស្គី ខណៈក្រុមហ៊ុនផលិតឱសថអង់គ្លេស AstraZeneca បានប្រកាសវិនិយោគ ១៥ ពាន់លានដុល្លារនៅក្នុងប្រទេសចិន។ លោក Starmer បានចំណាយពេលប្រហែល ៣ម៉ោងជាមួយលោក Xi ក្នុងកិច្ចប្រជុំកំពូលជាផ្លូវការ និងអាហារថ្ងៃត្រង់ ដែលអំឡុងពេលនោះ មេដឹកនាំទាំងពីរពិភាក្សាពីពាណិជ្ជកម្ម និងសន្តិសុខ សង្គ្រាមនៅអ៊ុយក្រែន និងបាល់ទាត់ និងបញ្ហាមួយចំនួនទៀត។

នៅពេលចាប់ផ្តើមកិច្ចប្រជុំ លោក Starmer បានប្រាប់លោក Xi ថា៖ «ចិនគឺជាតួអង្គសំខាន់មួយលើឆាកអន្តរជាតិ ហើយការកសាងទំនាក់ទំនងដ៏ទំនើបជាងមុនគឺមានសារៈសំខាន់ណាស់ ដែលភាគីទាងពីរអាចកំណត់ឱកាសដើម្បីសហការ និងអនុញ្ញាតឱ្យមានការសន្ទនាប្រកបដោយអត្ថន័យ លើផ្នែកដែលមិនយល់ស្របគ្នាផងដែរ»។ លោក Xi វិញបានលើកឡើងថា ចិនបានត្រៀមខ្លួនរួចជាស្រេចក្នុងការអភិវឌ្ឍភាពជាដៃគូរយៈពេលវែងជាមួយចក្រភពអង់គ្លេស បន្ទាប់ពីមាន «ភាពច្របូកច្របល់ និងការប្រែប្រួល» ក្នុងទំនាក់ទំនង ដែលមិនបានបម្រើផលប្រយោជន៍របស់ប្រទេសណាមួយឡើយ៕